بەڕێز مەکتەبی سیاسی حزبی زەحمەتکێشانی کوردستان

سڵاوی رزگاری و سەرخۆبوون..

بەبۆنەی ١٢ی سێپتێمبەر، ساڵرۆژی دامەزراندنی حزبی زەحمەتکێشانی کوردستان ، بە ناوی خۆمان و لە جیاتی هەڤاڵانمان لە سەرکردایەتی حزبی رزگاریی کوردستان جوانترین پیرۆزباییتان لێدەکەین، لە رێی ئێوەی بەڕێزیشەوە پیرۆزبایی لە سەرجەم هەڤاڵانی حزبە تێکۆشەرەکەتان دەکەین، دەخوازین کە هەمیشە سەرفرازو سەرکەوتووبن.

ئەمڕۆ لە ١٢ی سێپتێمبەر کە یادی بیست و حەوتەمین ساڵەی دامەزراندنی حزبی زەحمەتکێشانی کوردستان دەکرێتەوە، رۆژهەڵاتی ناڤین، بەتایبەتیش باشووری کوردستان لە رەوشێکی تایبەت دایە، بەهۆی پاشگەزبوونەوەی فەرمانڕەوایانی بەغداد لە جێبەجێکردنی ماددەی ١٤٠ و پێکهێنانی فەرماندەیی ئۆپەراسیۆنی دیجلە، هەنووکە باشووری کوردستان لە رەوشێکی ئاوارتە دایە، خۆشبەختانە کوردستانیان و هێزە سیاسیەکانی یەکڕێزو یەکهەڵوێست لەیەک سەنگەر دان، بەوهۆیەشەوە پیلان و سیناریۆکانی سەرۆکوەزیران پوچەڵ دەبێتەوە و پێگەی باشووری کوردستان بەهێزو قایمتر دەبێ؛ لە لایەکی دیکەشەوە بەهۆی راپەڕین و تێکۆشانی هەمەلایەنە رۆژئاوای کوردستان بەرەو سەرکەوتن هەنگاو هەڵدەگرێتەوە، ئەوەش وایکردوە کە دۆزی کوردستان بێتەوە سەرشانۆی نێودەوڵەتی، ئێستا کۆمەڵگەی نێودەوڵەتی پێداگری لەسەر ماف و رۆڵی کورد لە داهاتووی سوریە دەکات. هەروەها رەوشی رۆژهەڵات و باکووری کوردستانیش لە قۆناغی پێشكەوتووتر دان، ئەوانەش ئاماژەی ئومێدبەخشن و دەبێ کاریان لەسەر بکرێ. بەوهیوایەن کە ساڵڕۆژی حزبی زەحمەتکێشان ببێ بە رۆژی یەکهەڵوێستی کوردستانیان.

لە کۆتاییدا جارێکی دیکەش بیست و حەوتەمین ساڵیادی دامەزراندنی حزبە خەباتگێڕەکەتان پیرۆز دەکەین، هەر بەوبۆنەیەوە جەخت لەسەر پێوەندی نێوان هەردوو حزبی رزگاری و زەحمەتکێشانی کوردستان دەکەینەوە.

مەکتەبی سیاسی

حزبی رزگاریی کوردستان

١٢-١٢-٢٠١٢