رێگرتن لە تەڤگەری ئازادی ئەوپەڕی خۆسەپاندنە

سەرچاوەکانی هەواڵ رایانگەیاند کە کۆمیسیۆنی باڵای سەربەخۆی هەڵبژاردن و راپرسی هەرێمی کوردستان رێینەداوە کە تەڤگەری ئازادی کۆمەڵگەی کوردستان بەشداری لە هەڵبژاردنی پەرلەمانی کوردستاندا بکات کە بڕیاروایە لە سی مانگی ئەیلولدا بەڕێوەبچێ. ئەم بڕیارەی کۆمیسیۆن هەم بڕیارێکی سیاسی و هەمیش خۆسەپاندنی لایەنێکی سیاسی خۆیا دەکات، ئێمە ئەو کردارەی کۆمیسیۆن لە قاو دەدەین، دەشزانین کە کۆمیسیۆن سەربەخۆ نیە، ئەندامەکانی نوێنەرانی حزبەکانیانن، هەم لەلایەن حزبەکانیانەوە ئاراستە دەکرێن، هەمیش راستەوخۆ لەلایەن دەستەڵاتدارانەوە فەرمانیان پێدەکرێ و بۆ مەرامی خۆیان رایاندەسپێرن.

مخابن دەستپێکی کارەکانی کۆمیسیۆنی باڵای سەربەخۆی هەڵبژاردن و راپرسی هەرێمی کوردستان نیشانیدا کە تۆزقاڵێک لە سیاسەتی دەستەڵاتداران لانادەن و هیچ بەهایەک بۆ دیموکراسی و هەڵبژاردن ناهێڵنەوە کە خۆیان بانگەشەی بۆ دەکەن.

کۆمیسیۆنی باڵای سەربەخۆی هەڵبژاردن و راپرسی هەرێمی کوردستان هەم دامەزراندنەکەی گوماناوی و ناراست بوو، هەمیش کردارەکانی ئێستای. کوردستان پێویستی بە کۆمیسیۆنێک هەیە کە ئەندامەکانی کەسانی پسپۆڕو شارەزایی یاسایی بن و ئەندامی هیچ حزبێک نەبن، دەنا دەنگی جەماوەر لە ئاوێ دەکەن و بەو شێوەیەی کە حزبەکان دەیانەوێ پێشکەش بە حزبەکانی خۆیانیان دەکەن.

لە کۆتاییدا جارێکی دیکەش نیگەرانی خۆمان دەردەبڕین ئەو کردارەی کۆمیسیۆن لە قاو دەدەین.

مەکتەبی راگەیاندنی

حزبی رزگاریی کوردستان

١٦-٧-٢٠١٨