رژێمی تورکیا ریسوا دەکەین

به گوێرهی سەرچاوەکانی هەواڵ ئێوارەی رۆژی 28 -12-2011، نزیکهی 50 کۆڵبهری ناوچهی شڕناخ، له کاتی گهڕانهوهیان گوندهکانیان، دە کەمینی سهربازانی تورک دەکەون، ئهوان بێچهک و لاشەر بوون، بۆ دابینکردنی بژیوی بنهماڵهکانیان، کۆڵبهریان دەکردو سووتهمهنی و شتومهکیان له سنوورهکانی باشووری کوردستانهوه دەهێنا و دەبرد. ئەو کۆڵبەرانە بۆ دەربازکردنی گیانی خۆیان و کۆڵەکانیان بەرەو چیا رادەکەن و له ئهشکهوتێک له نزیک گوندهکانی رۆبۆسکی و بێجوهێ، خۆیان حهشار دهن. بهڵام به داخهوه فڕۆکه شهڕکهرهکانی تورکیه هێرشیان دەکەنەسەر ئاگربارانیان دەکەن، لە ئاکامدا نزیکهی 40 کهس لهوان گیان له دهست دهدهن و ئەوانی دیکەش بریندار دەبن.

بێگومان پهنابردن بۆ کۆڵبهری لە ناچارییەوە سەرچاوەی گرتووەو بەمەبەستی پهیداکردنی بژیوە، چونکە هێنان و بردنی شتومهک له سنوورهکانهوه ،که پێویستی به تێپهڕبوون به نێو مهیدانی مین و کهمینی هێزه چهکدارهکان ههیه، یهکێک له سهختترین و مهترسیدارترین کاری کوردستانیانی نیشتەجێی سنوورەکانە، کەچی سەربازانی رژێمی تورکیاو فڕۆکە جەنگیەکان دەست لەو کۆڵبەرانە ناپارێزن و بە رقەوە هێرشیان دەکەنە سەرو دەیانکوژن، ئەوەش تاوانێکی بێوێنەیەو دەبێ کۆمەڵگەی نێودەوڵەتی وەدەنگ بێت و کۆمیتەیەک بۆ لێکۆڵینەوە پێکبهێنێ و بکوژان دادگەیی بکات و سزایان بدات.

ریسوایی و سەرشۆری بۆ بەرپرسانی رژێمی تورکیای مرۆڤکوژ..

مەکتەبی سیاسی

حزبی رزگاریی کوردستان

٢٩-١٢-٢٠١١