حزبی رزگاریی کوردستان و پارتی یەکێتیی کورد لەسوریا کۆدەبنەوە

دوێنێ ٢٩-١-٢٠١٢ لە شاری هەولێر، پارتی یەکێتیی کورد لە سوریاو حزبی رزگاریی کوردستان کۆبوونەوە، لەو کۆبوونەوەیەدا باس لە گۆڕانکاریەکانی ناوچەکەو کوردستان کرا، هەردوولا خوازیاربوون کە کوردستانیان سوود لە گۆڕانکاریەکانی ناوچەکە وەربگرن و ئەو دەرفەتە لە دەست نەدەن، بەتایبەیش ئەو راپەڕین و تەنگژەو قەیرانەی کە لە سوریا ماوەی ساڵێکە دەستی پێکردوە، هەلێکی باشی بۆ کوردانی رۆژئاوا رەخساندوە، بۆیە وادەخوازێ کە هێزە کوردستانیەکان بەیەکگرتوویی وەڵامی پێداویستیەکانی سەردەم بدەنەوەو یەکدەنگ پارێزگاری لە مافەکانی گەلی کورد بکەن. هەروەها لەتەوەرێکی دیکەدا، کۆبوونەوەی هێزەکانی رۆژئاوای کوردستان کە لە شاری هەولێر بەڕێوەچووە، بە گرنگ و پڕ بایەخ نرخێندرا، بەتایبەتیش بەهۆی ئەوەی کە کۆنفرانسەکە لە پێتەختی هەرێمی کوردستان و بە ئامادەبوونی ژمارەیەکی زۆر لە نوێنەرانی هێزولایەنە سیاسیەکان و کەسایەتیە سەربەخۆکان پێکهاتبوو، بڕیارو راسپاردەی گونجاوی وەرگرتووە. هەر بەوهۆیەوە جەخت لەسەر پێوەندی نێوان لایەنە سیاسیەکانی کوردستان کرایەوە.

دەبێ بگوترێ کە پەیوەندی نێوان حزبی رزگاریی کوردستان و پارتی یەکێتیی کورد لەسوریا، لە ئاستێکی پێشكەوتوودایە، لە رابردووشدا بەیەکەوە لە ناوەندی سەربەخۆیی کوردستاندا هاوکارو هاوخەباتانە درێژەیان بە تێکۆشان داوە.

جێی ئاماژە پێکردنە کە لەو کۆبوونەوەیەکدا لەلایەن پارتی یەکێتیی کورد لەسوریا بەڕێزان عەبدولباقی یوسف و دکتۆر سەعید مەلا ئەندامانی مەکتەبی سیاسی ئامادەببوون، هەروەها لە لایەن حزبی رزگاریی کوردستانیش هەڤاڵ رێکار ئەحمەد، سکرتێری گشتی حزب و شاندێکی یاوەری ئامادە ببوون.