هەڵوێستێکی بوێرانە

حەوتووی رابردوو بەرێز سەرۆکی هەرێمی کوردستان هەم سەردانی کەرکوک و هەم دیداری وەزیری دەرەوەی بەریتانیای کرد. سەرۆکی هەرێم لە کەرکوک بەڵێنی دا کە لە چوارچێوەی هەرێمی کوردستاندا مافی نەتەوەکەمایەتیەکانی ئەم شارە دەپارێزێت.

هەروەها لە چاو پێکەوتنی دەگەڵ ویلیام هێگ، وەزیری دەرەوەی بەریتانیا، راشکاوانە رایگەیاند کە ماددەی ١٤٠ جێبەجێ کراوە و ئیدی قسەی لێناکرێتەوە.

ئەو هەڵوێستە بوێرانەیە نیشاندەری کۆدەنگی و هاوهەڵوێستیی نەتەوەیی و ژیریی هەموو پارتە سیاسیەکانی باشوری کوردستانە کە لە زمانی سەرۆکی هەرێمی کوردستانەوە دەکوترێ کە جێگای سەربەرزی و شانازییە.

پارتی سەربەخۆیی کوردستان، خوازیار و چاوەروانە کە رۆشنبیران، نوسەران، هونەرمەندان و رێکخراوە سیاسی و مەدەنیەکانی هەموو بەشەکانی کوردستان ئەم هەنگاوانە بەرز بنرخێنن و رووحی یەکگرتوویی و هەستی نەتەوەیی و نیشتمانپەروەری لە دەماری گەلەکەماندا بجولێنن.

چاوەروانیمان هەیە کە مێدیای کوردی، لە جیاتی باوەشێنکردنی ناکۆکی و نارەزایەتیەکان هەستی هاوچارەنوسی، فیداکاری و خۆشەویستی و بەشداری لە دۆزینەوەی رێگاچارە بۆ کەمکردنەوەی کەم و کورییەکان بە پشتیوانی گەل و دەسەڵات بدۆزێتەوە و هەستی نەتەوەیی بگەشێنێتەوە.

بەرێزان!

نەتەوەکەمان ئەورۆ لە باشوری کوردستان لە بەردەم ئەزمونێکی گەورەو و مێژویی دایە، هەلێکی لەبار رەخساوە کە لە مێژوی خوێناوی گەلی کوردستاندا رووداوێکی تازەیە، ئەم هەلە دەبێ بەو پەری ژیرێوە بقۆزرێتەوە و دەبێ یەکگرتوویی نەتەوەیی وەها بخوڵقێ کە داگیرکەرانی کوردستان نەک هەر نەتوانن ئیرادەی پۆڵاینی بروشێنن بەڵکە بە وەستان لە پشت دەسەڵاتی سیاسی هەرێمی کوردستان و رێخۆشکردن بۆیان ببنە هێزێکی لەبن نەهاتوو و هاندەربن بۆ بەرزکردنەوەی ئاڵای پیرۆزی سەربەخۆیی لە باشوری کوردستان.

پارتی سەربەخۆیی کوردستان

٢٠١٤٠٧٠١