سەبارەت بە هەرێمبوونی پارێزگاکان هەڤاڵ رێکار ئەحمەد بۆ رادیۆی پەیامنێر دەدوێ

رۆژی ٢٥-١-٢٠١٢ لە پەیوەندێکی تەلەفۆنیدا لەگەڵ رادیۆی پەیامنێردا، هەڤاڵ رێکار ئەحمەد سکرتێری گشتی حزبمان، حزبی رزگاریی کوردستان سەبارەت بە هەرێمبوونی پارێزگاکان رامانی حزبی رزگاری ئاشکرا کردو، رایگەیاند کە ئەوان بە تەواوی دژی بە هەرێمبوونی پارێزگاکانن و پێیانوایە کە بەهەرێمبوونی پارێزگاکان لە سەنگایی و بایەخی هەرێمی کوردستان کەم دەکاتەوە.

رێکار ئەحمەد سەبارت بەو پرسە گوتی: ئێستا بە کردەیی هەرێمی کوردستان لە سێ پارێزگاو نیو پێکهاتووە، بەڵام ئەگەر بەهەرێمبوونی پارێزگاکان سەربگرێت، ئەوکاتە یەک پارێزگا لەبەرانبەر هەرێمی کوردستاندا دەبن و لەگەڵ سەنگایی و قورسایی هەرێمی کوردستان هاوسەنگ دەبن، لەلایەکی دیکەشەوە بەهەرێمبوونی پارێزگاکان گورز لە دۆزی گەلی کوردستان دەدات، چونکە ئەگەر پارێزگاکانی وەک دیالە، موسڵ، تکریت و کەرکوک ببن بە هەرێمی سەربەخۆ، واتە ناوچە دابڕێندراوەکان لە هەرێمی کوردستان دوورتر دەکەونەوە، بەوهۆیەشەوە زیان بە کێشەی گەلی کوردستان دەکەوێت.

رێکار ئەحمەد ئەوەشی نەشاردەوە کە کەرکوک، دیالاو موسڵ بەشێکن لە کوردستان و نابێ داببڕێندرێن، هەروەها قەزاێکی کوردستانی لە سەردەمی رژێمی سەدام دا خراوەتە سەر پارێزگای تکریت، بۆیە تا ئەو ناوچانە نەگەڕێنەوە مافەکانی خەڵکی باشووری کوردستان پارێزراوو مسۆگەر نابن.

هەڤاڵ رێکار ئەحمەد، سکرتێری گشتی حزبی رزگاریی کوردستان گوتی: پێمانوایە کە هەوڵدان بۆ بەهەرێمکردنی پارێزگاکان سیناریۆ، پیلان و بەرنامەێکی وڵاتانی دراوسێیەو دژ بە هەرێمی کوردستان داڕێژراوە، دەنا بۆ چەند ساڵ لەمەوبەر کە نۆ پارێزگای شیعەنشین لەهەوڵدابوون بۆ دروستکردنی هەرێمێکی فیدراڵ، سوننەکان دژیان دەوەستان و ئەوەیان بە دابەشبوونی عێراق لێکدەدایەوە؟؟

لەلایەکی دیکەوە رێکار ئەحمەد جەختی کردەوە کە کێشەکانی ناو عێراق بەوە چارەسەر دەکرێن کە دوو یا سێ هەرێم هەبن، دواییش ببن بە کۆنفیدراڵی و پاشانیش ببن بە سێ دەوڵەتی سەربەخۆ، چونکە لە کاتی دروستکردنی دەوڵەتی عێراق بەو سنووری ئێستایەوە پرس و راوێژ بە دانیشتووانی ویلایەتەکانی موسڵ، بەغداد و بەسرە نەکراوە.

*لە رادیۆی پەیامنێر وەرگیراوە