نامەیەکی کراوە بۆ سەرۆکی حکومەتی هەرێم

بەڕێز کاک نێچیرڤان بارزانی، سەرۆکی ئەنجوومەنی وەزیرانی حکومەتی هەرێمی کوردستان

سڵاوی رزگاری و سەرخۆبوون..

دوای ئەوەی تەواوی هەوڵەکانمان بۆ گێرانەوەی بودجەی حزبمان، حزبی رزگاریی کوردستان ناکام بوون، دوای ئەوەی دەیان نامەمان بۆ سەرۆکایەتی ئەنجوومەنی وەزیران ناردو وەڵام نەدراینەوە، ئیدی بەپێویستمان زانی لە رێی نامەی کراوەوە خواستی خۆمان بگەیەنین و ئەو ستەمە بخەینەڕوو کە ماوەی سێ ساڵە چڕتر دەکرێتەوەو درێژەی پێدەدرێ.

بەڕێز سەرۆکی حکومەتی هەرێم! حزبی رزگاری لە ١٥-٨-١٩٩٣ ڕاگەیاندراوەو لە ٢٤-٦-١٩٩٥ مۆڵەتی کارکردنی لە حکومەتی هەرێمی کوردستان پێدراوە، لە ساڵی ١٩٩٩ بودجەی مانگانەی لە ئیدارەی سلێمانی بۆ تەرخان کراوە، کەچی لە سەرەتای ساڵی ٢٠١٠ بەبێ ئاگادارکردنەوە و پێراگەیاندن، بودجەکەمان لێراگیرا، هەبوونی کاک زەید مەحمود کرا بەبیانۆ، لە کاتێکدا ئەو ساڵی ١٩٩٤ لە ئێمە دابڕابوو، هەرچەندە بیانۆێکی نابەجێ و ستەمێکی ئاشكرابوو، بەڵام لەسەر پێشنیار و پێداگری وەزارەتی ناوەخۆ، لە ١٧-٥-٢٠١١ لەگەڵی رێککەوتینەوە، دواتر بەڕێز وەزارەتی ناوخۆ بەنووسراوی ژمارە ١١٠٩٩ لە ٢٥-٥-٢٠١١ داوای لە وەزارەتی دارایی کرد تا بودجەکە بۆ حزبی رزگاری بگێڕنەوە، بەڕێز وەزارەتی داراییش بە نووسراوی ژمارە ٣١٤/١١٥٥١ لە ١٦-٦-٢٠١١ داوای رەزامەندی لە سەرۆکایەتی ئەنجوومەنی وەزیران کرد، بەڵام مخابن رۆژی ٢٦-٦-٢٠١١ بە ژمارە ١٤٣٥٢ لە ژمێریاری ئەنجوومەنی وەزیران ژێردەست کراو وەڵام نەدرایەوە، دواتر کاک زەید مەحمود وازی لە حزبی رزگاری هێناو سەنگەری بۆ ناو ریزەکانی یەکێتیی نیشتمانیی کوردستان گواستەوە، ئیدی پاساو بۆ نەگێڕانەوەی بودجە نەمایەوە.

دیسانەوە هەر بۆ ئەو مەبەستە نامەمان بۆ بەڕێز سەرۆکی هەرێمی کوردستان نارد، ئەوەبوو سەرۆکایەتی هەرێمی کوردستان نووسراوی ژمارە ١٣٧ی لە ٢٧-٢-٢٠١٢ ئاراستەی سەرۆکایەتی حکومەتی هەرێمی کوردستان کرد، چاوەڕوان بووین کابینەی حەوتەم وەڵام بداتەوەو بودجەکەمان بۆ بگێڕتەوە، کەچی سەرۆکایەتی ئەنجوومەنی وەزیران بەنووسراوی ژمارە ١٢٢٩ لە رۆژی ٢٤-٥-٢٠١٢ لەسەر راسپاردەکەی سەرۆکایەتی هەرێم رەزامەند نەبووە. ئەمە لەکاتێکدایە کە بەبێ هۆی یاسایی بودجەکە راگیراوەو هەروەها بەڕێز وەزارەتی ناوەخۆ، وەزارەتی دارایی و سەرۆکایەتی هەرێم خوازیاربوون تا بودجەکەمان بۆ بگەڕێتەوە. لەلایەکی دیکەوە بەڕێزتان بەڵێنتان دابوو کابینەی حەوتەم بکەن بە کابینەی هەمووان و تێکۆشەران نانبڕاو نەکرێن، بەڵێنتان دا بوو کە دیموکراسی بەرفراوانتر بکرێ و رێی کارکردن لە هیچ لایەنێک نەگیرێ، بۆیە چاوەڕوانبووین لەگەڵ دەستبەکاربوونتان بڕیار لەگێڕانەوەی بودجەی حزبی رزگاری دەدرێ و ئەو ستەم و بەربەستە لەبەردەم حزبی رزگاری هەڵدەگیرێ.

بەڕێز کاک نێچیرڤان! ئێمە کە لە شۆرشی نوێ دەستمان بە تێکۆشان کرد، هەروەها کاتێک حزبی رزگاریی کوردستانیشمان راگەیاند چاومان لە بودجەو زێدەماف و پاداشت نەبوو، مەبەستمان خزمەتکردن و بنبڕکردنی ستەم و نابەرابەری بوو. ئێستا پێمانوایە بۆ ئەوەی ریزەکانی کوردستانیان پتەوو پارێزراو بێ، دەبێ بەیەکچاو سەیری لایەنەکان بکرێ و یەکپێوەر دەکاربکرێ. هەروەها دەخوازین بودجە بۆ حزبی رزگاریی کوردستان بگەڕێتەوە و وەك حزبە مۆڵەتپێدراوەکان رەفتاری لەگەڵدا بکرێ،چونکە پێمانوایە شیاوی ئەو بێدادیە نین کە لەگەڵمان دەکرێ.

لەگەڵ رێزماندا

رێکار ئەحمەد

سکرتێری گشتی

حزبی رزگاریی کوردستان

٢٧-٨-٢٠١٢