مانگرتنی زیندانیان و رێپێوانی باکوور رابوونەوەی کوردستانە

کۆمەڵانی هەراوی خەڵکی کوردستان

ئازادیخوازانی تورکیاو جیهان!

ئەمڕۆ بەبەرچاوی هەموو جیهانەوە نزیکەی هەزار کوردی بەندکراو لە زیندانەکانی تورکیا بەهۆی مانگرتنیانەوە رووبەڕووی مەرگ دەبنەوە، کەچی وڵاتانی جیهان، رای گشتی و کۆمەڵگەی نێودەوڵەتی خەمساردن، گوشار لە رژێمی تورکیا ناکەن و هەوڵی رزگارکردنی گیانی ئەو مرۆڤە ئازایخوازانە نادەن، لەلایەکی دیکەشەوە دانیشتوانی شارەکانی باکووری کوردستان پشتیوانی خۆیان لە خواستی ئەوان خۆیا کردوەو مانگرتنی گشتیان راگەیاندوە، لە باشوور و رۆژهەڵات و رۆژئاوای کوردستانیش هەڵمەتی پشتیوانیکردن دەستی پێکردوە، ئەوەش شێوازێکی نوێی تێکۆشان و رابوونەوەی گەلی کوردستانە، خەباتێکی هاوچەرخانەو شارستانیانەیە، پەیامی نەتەوەی کوردە بۆ چارەسەرکردنی دۆزی نیشتمانە داگیرکراوەکەی، بۆئەوەی لە رێی ئاشتی و دانوستاندنەوە بە مافە رەواکانی خۆی بگات، بۆیە لە ئاکامدا کاربەدەستانی ئەنکارا بەچۆک دادێن و ناچار دەبن کە وەڵامی ئەرێنی داواکانیان بدەنەوە. ئێمە وەک دوو لایەنی سەربەخۆخوازی کوردستان لەکاتێکدا شێلگیرانەو لێبڕاوانە پشتیوانی لە مانگرتووان دەکەین و هێزو توانای خۆمان دەخزمەت خواستەکانیان دەکار دەکەین، لەهەمان کاتدا داوا لە کۆمەڵگەی نێودەوڵەتی و رێکخراوەکانی مافی مرۆڤ دەکەین کە دەستوبرد بکەن و گیانی مانگرتووانی نێو زیندانەکانی تورکیا رزگار بکەن، بۆ ئەوەش پێویستە کە گوشار لە حکومەتی ئەنکارا بکەن تا وەڵامی ئەرێنی خواستەکانی مانگرتووان بداتەوە.

لای هەمووان ئاشکرایە کە حکومەتی ئەنکارا لەکاتێکدا بانگەشەی ئازادی و دیموکراسی و مافی مرۆڤ دەکات، بەوبیانۆیەشەوە هاوکاری گەلانی راپەڕیوی دژ بە فەرمانڕەوایان درێژە پێدەدات، کەچی راشکاوانە نکۆڵی لە مافی نەتەوەی کورد دەکات، مافی پارێزگاری و داکۆکیکردن بە زمانی دایک بۆ بەندکراوانی ناو زیندانەکانی خۆی ناسەڵمێنێ، دژ بە خواستی ئاشتیخوازنەی گەلێکی ژێر قەڵەمڕەوی خۆی دەوەستێتەوە، بەوهۆیەوە هەموو بانگەشەکانی کاربەدەستانی تورکیا پوچەڵ بوونەتەوە، ئەوان نەک دیموکراسی نین و باوەڕیان بە ئازادی نیە، بەڵکو داگیرکارو خۆسەپێنن، گەرەکیانە بە زۆرەکی گەلێک بە ژێردەستی بهێڵنەوەو درێژە بە داگیرکاری بدەن، بەڵام ناکام دەمێننەوە، چونکە مێژوو سەڵماندوویەتی کە بە ئاگرو ئاسن هەڵسانەوەی نەتەوەیەک کپ ناکرێتەوە، ئیدی سەردەمی داگیرکاری و بێماف هێشتنەوە لە لەنگەری کۆتایی نزیک بۆتەوە.

لە کۆتاییدا لەکاتێکدا زۆر بە تووندی سیاسەتی داگیرکارانەو نامرۆڤانەی حکومەتی ئەنکارا ریسوا دەکەین، لەهەمان کاتدا پشتیوانی خۆمان بۆ خواستی مانگرتووان دووپات دەکەینەوەو دەنگی خۆمان تیکەڵی دەنگی ئەوان دەکەین و دەڵێین: ئازادی بۆ گەلی کوردستان.

جەماوەری بەشەرەفی کوردستان!

حکومەتی ئەنکارا نەک هەر دژی خواستەکانی گەلی باکووری کوردستان راوەستاوە بەڵکو لەهێرش و پەلامارەکانی بۆ سەرخاکی باشووری کوردستان بەردەوامە، بەبەرچاوی هەموو جیهانیانەوە فڕۆکە جەنگیەکانی تورکیا گوندو ئاواییەکانی باشووری کوردستان بۆردومان دەکەن، خەڵکی سڤیل و لاشەڕ شەهیدو بریندار دەکەن، گوندەکان و شوێنی دانیشتنی خەڵک خاپور دەکەن و زیان بە ژینگەی نیشتمانەکەمان دەگەیەنن، بۆیە کاتی ئەوە هاتووە کە هێزە سیاسیەکان و تێکڕای کوردستانیان دژ بە حکومەتی ئەنکارا هەڵوێست بگرن، لانی کەم بایلۆتی بەرهەمەکانی تورکیا بکەن، بۆ گەشتوگوزار روو لەو وڵاتە نەکەن و بازرگانی لەگەڵدا رابگرن.

* سەرکەوێ خەبات لەپێناو کوردستانێکی سەربەخۆ

* ریسوایی بۆ داگیرکاران و مرۆڤکوژان

مەکتەبی سیاسی حزبی رزگاریی کوردستان

دەفتەری سیاسی پارتی سەربەخۆیی کوردستان

٦-١١-٢٠١٢