دیداری ماڵپەڕی مالمۆکورد لەگەڵ هەڤاڵ رێکار ئەحمەد

١ - ئێوە وەک پارتی ڕزگاری کوردستان پێگەی خۆتان لە کوێی ڕیزبەندی حیزبەکانی باشوری کوردستان ئەبیننەوە ؟ مەبەست لە چ بەرەیەکەوە نزیک؟.

وەڵام: حزبی رزگاریی کوردستان هەر لە سەرەتاوە، واتە لەدەستپێکی راگەیاندنیەوە، لە ١٥ی ئابی ١٩٩٣وە، باوەڕی بەوە هەبووە کە دەبێ سەنگەری دەستەڵات و ئۆپۆزیسیۆن لەیەکتر هاوێربکرێن، بۆ پێشخستن و خزمەتکردنی زیاتر کێبەرکێ و ململانێ بکەن؛ لەوڕوانگەیەوە بەهۆی ئەوەی لە دەستەڵاتدا نەبووە، هەوڵی داوە وەک ئۆپۆزیسیۆن کار بکات، ئێستاش بەهەمان پێوەر خۆی لەبەرەی ئۆپۆزیسیۆندا دەبینێتەوە. ئەو کاتەی کە حزبی رزگاریی کوردستان باسی لە ئۆپۆزیسیۆنبوون دەکرد، ئەو لایەنانەی کە ئێستا خۆیان بە ئۆپۆزیسیۆن دەناسێنن و کاری ئۆپۆزیسیۆن دەکەن، بەشێک بوون لە دەستەڵات. ئێمە لە ساڵی ٢٠٠٦ لەگەڵ دوو لایەنی دیکەی کوردستانیدا 'بەرەی گۆران'مان پێکهێنا، بەڵام ئەو بەرەیە تەمەنی درێژ نەبوو، وردە وردە لەژێر گوشارەکانی دەستەڵاتدا پاشەکشەی کرد، کێشەی ناوەخۆ بۆ حزبەکان دروست کرا، سەرەنجام بەرەی گۆڕان کە ئامانجی سەرەکی دەستاودەستکردنی دەستەڵات و ژیانێکی باشتر بوو، سڕکرا.

٢ - بەڕێزتان زۆرجار هەوڵتان داوە بەرەیەک لە چەپەکانی کوردستان دروست بکرێت ! ئایا ئێستاش ئەو هەوڵەتان بەردەوامە ؟ وە ئەو نیازەتان هەر ماوە ؟

وەڵام: کۆکردنەوەو یەکخستنی هێزوتوانای چەپەکان و سەربەخۆخوازەکان لەبەرەیەکدا ئامانجی لە پێشی ئێمە بووە، بۆ ئەو ئامانجە تێکۆشاوین، بەڵام بەداخەوە تێیدا سەرکەوتوونەبووین. لە رابردوودا چەندین هاوپەیمانێتی لەو بابەتە پێکهێنران، بەهۆی لەبارنەبوونی رەوشەکە، یاخود دەکرێ بڵێم بەهۆی نەبوونی ئامادەیی پێویست لەلای لایەنەکانەوە ئەو هەوڵانە ناکام مانەوەو سەرکەوتوو نەبوون، ئێستاش من پێموایە کە دەبێ هێزە چەپ و یەکسانیخوازەکان خۆیان رێکبخەنەوەو لە ژێر چەترێکدا کۆببنەوە دەنا بێکاریگەر دەمێننەوەو گورگان خواردو دەبن.

٣ - لەسەرەتای دامەزراندنی پارتی ڕزگاری کوردستان هەندێک تۆمەت خرایە پاڵ بەڕێزتان لەوانە گوایە دەستێکی سیاسی ناوخۆتان لە پشتە ، هەڵویستان سەبارەت بەو تۆمەتە چێیە ؟

وەڵام: بێگومان هەڵوێست وەرگرتنی ئێمە بۆ هەندێک لایەن بە ئاسانی لێکنەدەدرایەوە و هەرس نەدەکرا، بەوهۆیەوە خوێندنەوەی ناڕاستیان بۆ هاوکێشەکە دەکرد و هەوڵی ناوزراندنی ئێمەیان دەداو دەیانویست لە گرنگی و بایەخی هەڵوێستی ئێمە کەم بکەنەوە. ئەوان پێیانوابوو ناکرێ کۆمەڵە گەنجێک هەڵوێست وەربگرن و سەربەخۆیی خۆیان بپارێزن، شەق لە بەرژەوەندی خۆیان بدەن و نەچن بۆ ناو لایەنە دەستەڵاتدارەکان.. ئەوێ رۆژێ بۆ گەیشتن بە پلەو سامان راکە راکەبوو، پایدۆزی دەکرا، بەڵام ئێمە دەستەیەک کادری ناو دووەمین کۆنگرەی حزبی یەکگرتنی کوردستان بڕیارماندا بمێنینەوەو درێژە بەکاروانی سەربەخۆخوازی بدەین. راشکاوانە گوتمان نامانەوێ ببین بە بەشێک لەو شەڕە نێوخۆییەی کە لە داهاتوودا تەڕو وشک بەیەکەوە دەسووتێنێ! ئەو کات زۆربەی سیاسیەکان گاڵتەیان بەو بۆچونەی ئێمە دەهات، پێیانوابوو کە ئێمە خەونمان دیوە و ئەو کارەساتە دووپات نابێتەوە!! بەڵام دواتر راستی بۆچوونەکانی ئێمە خۆیا بوون.. تەنانەت لە ساڵانی شەڕی نێوەخۆشدا ئێمە بێلایەنی خۆمان پاراست و بەشداریمان تێدا نەکرد. هەروەها لە ١٩٩٣ەوە تا ئەمڕۆ تەمەنێکە، رووداوەکان و هەڵوێستەکانی ئێمە خۆی لە خۆیدا ئەو تۆمەتانەی پوچ کردۆتەوە. تۆمەت هەڵبەستن کارێکی ئاسانە، بەڵام سەڵماندن و وەدەستهێنانی بەڵگە زەحمەتە، کاتێکیش تۆمەتەکان ناڕاست دەردەچن، شەرمەزاری لە بەرۆکیان دەدرێ.. بێگومان ئەوانەی کە ئەوکات تۆمەتیان بۆ هەڵدەبەستاین و وایان بڵاو دەکردەوە کە دەستێکی ناوەخۆ بۆ مانەوەو راگەیاندنی حزبی رزگاری هانی داوین، ئێستا ئاچڕە دەسڕن و شەرمەزارن، چونکە تۆمەتەکانیان ناڕەواو بێ بنەما بوون و لە رق و ئیرەییەوە سەرچاوەیان گرتبوو.

٤ - لێکدانەوەتان بۆ کلتوری سوتاندنی بارەگاکانی هێزی ئوپوزسیون لە باشوری کوردستان چییە ؟

وەڵام: سووتاندنی بارەگەو شوێنە گشتی و کەسیەکان خۆی لە خۆیدا کولتوری کۆنەپارێزیە، دەنا بەسووتاندنی بارەگەو ماڵ و شوێنە گشتی و کەسیەکان کێشەکە یەکلایی نابێتەوەو کۆتا نابێت، بەڵکو قوڵتری دەکاتەوە. من نەک لەگەڵ سووتاندنی بارەگەی هیچ حزبێک دانیم، تەنانەت لە کاتی راپەڕینیشدا دژی سووتاندنی دامودەزگەکانی حکومەت بووم، پێموابوو دەکرێ دەستیان بەسەردا بگیرێ و بۆ داهاتوو سوودیان لێوەربگیرێ، دەبوایە چاو لە شۆڕشی گەلان بکەین، ئەو شوێنانە بکەین بە مۆزە نەک ئاگریان تێبەردەین و شوێنەواریان بسڕینەوە. لە سووتاندنی دامودەزگەکانی حکومەتی بەعس زەرەرمان کردو بەڵگەی بەسوودمان لە کیس چوون. ئێستاش سووتاندنی بارەگەو یانەکانی مەی خواردنەوە دوو زیانی پێگەیاندووین؛ یەکەم: کولتوری کۆنەپارێزی و تالانکاری پێشان دا، دیتران بە چاوێکی دیکەوە لێمان دەڕوانن. دووەم: دەبێ لە سامانی گشتیدا واتە لە پارەی خەڵک قەرەبوو بکرێنەوە.. ئەزموونی رابردوو هەیە، بۆیە من بە تووندی دژی سووتاندنی بارەگەو ماڵ و یانەو شوێنە گشتی و کەسیەکانم. ئەگەر لەو پێوەندەدا یاسا سەروەر بکرێ و دادگەکان سەربەخۆبن و تاوانباران سزا بدەن و ناچاریان بکەن لە گیرفانی خۆیان قەرەبوو بدەن، ئیدی رووداوی لەو بابەتە دووپات نابێتەوە.

٥ - پەیوەندیتان لەگەڵ ئوپوزسیون چۆنە ؟ وە هەڵوێستان چییە بەرامبەر دەسەڵات ؟

وەڵام: هەوڵمانداوە پێوەندیمان لەگەڵ هەموو هێزە سیاسیەکانی کوردستان ئاسایی بێت، بەڵام بەداخەوە تا ئەمڕۆکەش هێزە ئۆپۆزیسیۆن و دەستەڵاتدارەکان لە زۆر لێکدانەوەو بۆچوون و رەفتاردا لەبەرانبەر هێزەکانی دیکەدا هاوشێوەن، واتە دروشمی 'ئەوەی لەگەڵم نەبێت ، دوژمنە' ، پێڕۆ دەکەن. ئەوەش وایکردوە کە ساردی لە پێوەندی نێوان لایەنە سیاسیەکاندا هەبێت.

٦ - ئایا بەڕێزتان پێتان وایە بەهاری عەرەبی کاریگەری لەسەر باشووری کوردستان ئەبێت ؟

وەڵام: بێگومان گۆڕانکاریەکانی ناوچەکە کاریگەری لەسەر باشووری کوردستان دادەنێ، بەڵام مەرج نیە کتومت وەک ئەوانی دیکە بێت. ئەگەر سەیری رووداوەکانی تونس، میسر، لیبیا، یەمەن، بەحرێن و سوریا بکەین، بۆمان دەردەکەوێ کە لەهەندێک رووەوە لەیەک دەچن، بەڵام لەهەندێکی تردا جیاوازن.. راستیەکەی ئەوەیە لە هەر شوێنی تاکڕەوی، دیکتاتۆری و پاوانخوازی هەبێت، باهۆزەکە دەیگرێتەوە، باشووری کوردستان لە زۆر شت لەو وڵاتانە جیاوازە بەڵام لە پیادەکردنی سیاسەتی نابەرابەری و بەهەند وەرنەگرتنی رای خەڵک و برسی کردنی نەیاران و بەرتەسک کردنەوەی ئازادی رامان و رۆژنامەوانی هاوشێوەی ئەوانە، بۆیە وادەخوازێ کە دەستەڵاتدارانی باشووری کوردستان دەستوبرد بکەن، پڕۆسەی چاکسازی بخەنە واری کرداریەوە، رێ لە گەندەڵی و بەهەدەردانی سامانی گشتی بگرن.

٧ - چارەنووسی ڕژێمی سوری و کاریگەری مانەوە و نەمانەوەی لەسەر کورد چۆن دەبینن ؟

وەڵام: رژێمی سوریە لە تەنگژەێکی قوڵ دایە، مانەوەو رووخانی کاریگەری لەسەر رەوشی کوردستان دادەنێ. کورد نابێ هەروا لە خۆڕاوە بۆ روخانی رژێمی سوریە برژێتە سەرجادەو کوێرانە چەپڵە بۆ رکابەرانی رژێمی ئەسەد لێبدات، هەقە کورد ئیتر بۆ خۆی کار بکات، کێ زیاتری لێ هەڵدەکڕێندرێت، لای ئەو بگرێت.

ئێستا رژێمی سوریە شاننزمی بۆ خواست و داخوازیەکانی گەلی کورد لە رۆژئاوای کوردستان دەکات، بەڵام تا ئێستا نازاندرێ ئیخوان موسلیمین و نەیارەکانی دیکەی رژێمی ئەسەد چیان بۆ کورد پێیەو چی پەسند دەکەن، کەچی لە هەردوو حاڵەتەکەدا کورد قازانج دەکات. ئەگەر رژێمی سوریە بڕوخێت ئیدی کوردانی رۆژئاوای کوردستان جێ پێی خۆیان دەکەنەوەو دەبن بە دیفاکتۆ، خۆ ئەگەر رژێمی سوریەش بە پشتیوانی روسیاو چین و ئێرانەوە بمێنێ، دیسانەوە ئەو رژێمە ناچارە مافەکانی کورد لە رۆژئاوای کوردستان بسەڵمێنێ، بەڵام تا ئێستا کورد لەسەر باشترینەکەیاندا خۆی ساغ نەکردۆتەوە.

٨ - کشانەوەی ئەمریکا لە عێراق بە زیانی دۆزی کورد و پێگەیەتی یان نا ؟

وەڵام: ئەوانەی کە باوەریان بە هێزی دەرەکیە، کشانەوەی ئەمریکا بە زیانی دۆزی کورد لێکدەدەنەوە، دەنا رۆیشتنی ئەمریکا بە قازانجی دۆزی کورد تەواو دەبێ. هەڵبەت تا ئەمریکا لە عێراق بوو هێندە باکی بە کورد نەبوو، هەمیشە مەیلی بەلای سوننەو شیعەوە بوو، کوردی بە دەستەمۆ دەزانی، راپۆرتی بەیکەر- هاملتۆن باشترین بەڵگەبوو، ئێستا کە دەکشێتەوەو راستەوخۆ بوونی لە عێراقدا نابێ، ناچار دەبێ کە سەوداو مامەڵەش لەگەڵ کورددا بکات. لە لایەکی دیکەشەوە دەبێ ئەو راستیە بزانین بەهۆی ئەوەی کە ئەمریکا بەڵێنی بە عەرەب دابوو کە یەکێتیی خاکی عێراق بپارێزێ، ئیدی تا لە عێراق بوو پێبەندی بەڵێنەکەی بوو، بەڵام کە دەکشێتەوە ئەو بەرپرسیارێتیە لە ئەستۆی ئەودا نامێنێ، کەواتە کشانەوەی هێزەکانی ئەمریکا لە عێراق لە بەرژەوەندی دۆزی کوردستان تەواو دەبێ، ئێمە هەر لە سەرەتاوە بوونی هێزەکانی ئەمریکامان بە زیان زانیوە، لەو بارەیەشەوە رامان و هەڵوێستی خۆمان نە شاردۆتەوەو خوازیاربووینە کە هەرچی زووترە بکشێتەوە. بەوهۆیەشەوە هەندێک هێزی کوردستانی و عێراقی بوون بە ناحەز و هاوڕکی ئێمە. ئێمە پێمانوابووە کە پشتبەستن و گرەوکردن لەسەر هێزی دەرەکی ناکام دەمێنێتەوە، بەڵام پشتبەستن بە هێزو شیانی خۆمان کێشەی کوردستان بە سەرکەوتن دەگەیەنێ.

٩ - کێشەی طارق الهاشمي چۆن دەبینن ، ئایا ئەم کێشەیە دۆستایەتی کورد لەگەڵ سونە و شیعە بەرەو کوێ ئەبات ؟

وەڵام: کورد لە خۆڕاوە لاگیری لە هاشمی دەکات. وادیارە کورد زۆر بە زوویی رابردووی لەبیر دەچێتەوە، دەنا ئەگەر هەڵوێست و رامانەکانی چەند ساڵی رابردووی هاشمی هەڵبدەینەوە، دەردەکەوێ کە ئەو پیاوە چەند دژایەتی دۆزی کوردستانی کردوە، وێرای ئەوەی کە هاودەستی لەگەڵ رژێمی تورکیاو سوریادا کردوە. لەبەرانبەر ماددەی ١٤٠ و باسکردن لە کوردستانیبوونی کەرکوک و ناوچەدابڕاوەکان هەڵوێستی توندی پێشانداوە، هەمیشە مەیلی بەلای دەمارگیرو رەگەزپەرستانی عەرەب بووە، کەچی ئێستا شەرم لە خۆی ناکات و پەنای بۆ کوردستان هێناوە، وەک دەڵێن کوردیش میواندۆستەو سەرهەڵگرتوەکان داڵدەدات!! ئیدی ئەوەتا کورد شێلگیرانە داکۆکی لە هاشمی دەکات. پێموایە کێشەی هاشمی نەک دۆستایەتی کورد لەگەڵ سوننە باشتر ناکات، بەڵکو دۆستایەتی لەگەڵ شیعەش بەرەو لێوارەکە دەبات. راستە کێشەی باشووری کوردستان لەگەڵ سوننەیە، چونکە سوننەکان هاتوون و لە شارەکانی کەرکوک، دیالا و موسڵ جێواربوون، بۆیە بە هی خۆیانیان دەزانن و نامۆیی لە کوردستانبوونیان دەکەن، ئەوە سوننەکانن کە سنووری هاوبەشیان لەگەڵ کورددا هەیە، هانی تورکمان دەدەن دژ بە کورد رێ بگرێ، هانی شەبەک و ئێزدی دەدەن نکۆڵی لە کوردبوون بکەن. کەواتە بە داڵدەدانی هاشـمی ئەو هەموو ناکۆکیەو رق و دەمارگیریە کۆتا نابێ. دەکرێ بڵێین کە کێشەی هاشمی بەو شێوەی کە ئێستا هەیە گورز لە پێوەندیەکانی کوردو شیعە، کورد و سوننە دەدات و قازانجی لێناکەین.

١٠ - جار نەجار دروست بوونی هەرێمەکانی وەک دیالە و موسڵ و ئەنبار دێتە پێشەوە ئەم هەوڵ و نێتانە چۆن ئەبینیت ؟

وەڵام: لە دوو روانگەوە دژی فیدراڵی پارێزگاکانم، یەکەم: بەهەرێمبوونی پارێزگاکان لە سەنگایی و بایەخی هەرێمی کوردستان کەم دەکاتەوە، ئێستا هەرێمی کوردستان لە سێ پارێزگا پێکهاتووە، ئەوکاتە هەرێمێکی یەک پارێزگایی لەگەڵ هەرێمی کوردستانی سێ پارێزگا هاوسان دەبێ. دووەم: بەهەرێمبوونی پارێزگاکانی دیالاو موسڵ و تکریت و کەرکوک زیان بە نیشتمانی ئێمە دەگەیەنێ، دۆزی کوردستان بێناوەڕۆک دەکات. نازانم چۆن کورد ئەو مافە بە خۆی دەدات و پشتیوانی لە بەهەرێمبوونی پارێزگاکان دەکات؟! بە کوردی و بە کورتی هەوڵدان بۆ بەهەرێمکردنی پارێزگاکان نیازخراپیە، سیناریۆێکە بۆدژایەتی کوردستان برەوی پێدەدرێ، دەنا با عێراق ببێ بە سێ فیدرڵی، دواییش خۆی لە خۆیدا دەبێ بە سێ دەوڵەتی جیاوازو کێشەو ناکۆکیەکانی عێراق کۆتاییان پێدێ.

١١ - ئایا چارەنووسی عێراقی ئەمڕۆ بەرەو دابەش بوون ئەچێت ؟ یان بە یەکگرتووی ئەمێنێتەوە ؟

وەڵام: لەوانەیە هەڵەم نەکردبێ ئەگەر بڵێم عێراق هەرگیز یەکگرتوو نەبووە، بەڵکو بە ئاگرو ئاسن پێکهاتەکان لەنێو دۆزەخێکدا کۆکراونەتەوە، ئێستاش کە سەردەمی ئاگرو ئاسن بەسەرچوەو بەرەو کۆتابوون دەچێ، ئیدی عێراقیش بەرەو هەڵوەشانەوە دەچێ، هەندێک پێیدەڵێن دابەشبوون، راستیەکەی دابەشبوون نیە، بەڵکو راستکردنەوەی هەڵەێکی مێژووییە کە براوەکانی یەکەمین جەنگی جیهان بەبێ خواست و راوێژی نەتەوەکانی کوردو عەرەب، یاخود بەبێ پرسی دانیشتووانی سێ ویلایەتەکەی موسڵ، بەغدادو بەسرە ، وڵاتێکیان بەناوی عێراق دروست کرد.

١٢. ناکۆکی ئێران و ئەمریکا بە لێدانی سەربازی کۆتایی دێت یان هەر وەک ئەم دۆخەی ئێستا ئەمێنیتەوە?

وەڵام: زۆرێک لە چاودێران پێیانوایە لەم نزیکانەدا گورزی سەربازی لە ئێران دەوەشێنندرێ بەڵام من پێموایە لەم کاتەدا ئەمریکاو هاوپەیمانانی بۆ ئەو جەنگە ئامادەنین. بەتایبەتیش ناکام مانەوەی ئەمریکا لە ئەفگانستان و عێراق، هەروەها گیرۆدەبوونی بە قەیرانی ئابووری وادەکات کە بوێری ئەوە نەکات لە داهاتووێکی نزیکدا جەنگێکی دیکە بەڕێوە ببات. هەرچەندە جەنگی ناتۆ لە لیبیا دژ بە دەستەڵاتی معەمەر قەزافی بە رووکەش سەرکەوتنی بەدەست هێنا، بەڵام لە راستیدا لەوێشدا ناکام بوون، دوای وێرانکردنی لیبیاو کوشتنی قەزافی خەریکە گۆڕەپانەکە لەلایەن هێزە ئیسلامیە تووندڕۆکانەوە پاوان دەکرێ، کەواتە ژیرانە نیە ئەگەر لەم کاتەدا یان لە داهاتووێکی نزیکدا ئەمریکا خۆی دووچاری جەنگێکی دیکە بکات، یان هەڵەێکی دیکە بکات و سیمای خۆی ناشیرینتر بکات. لەلایەکی دیکەشەوە لە دێرزەمانەوە ئێرانیەکان لە گەمەی سیاسیدا براوە بوونە، ئەگەر سەیری سی ساڵی تەمەنی کۆماری ئیسلامی ئێران بکەین، وێرای ئەوەی کە ئەمریکاو ئەوڕوپاو ئیسرائیل دژی تاران سەنگەریان گرتووە، وێرای ئەوەی لە دەورانی شەڕی عێراق- ئێراندا وڵاتانی زلهێز، بەتایبەتیش ئەمریکاو رووسیا بە ئاشکراو بەنهێنی یارمەتی رژێمی سەدام حوسێنیان دەدا، بەڵام ئاکام لەبەرژەوەندی تاران کۆتایی هات، ئێستاش کۆماری ئیسلامی ئێران لە رۆژهەڵاتی ناڤیندا دەستی دەڕوات، گۆڕەپانی عێراق، سوریا. لوبنان و بەحرێن بەهی خۆی دەزانێ، لەو شوێنانە دۆست و هاوپەیمانی هەن. کەواتە باوەڕ ناکرێ ئەمریکا و ئیسرائیل لەم کاتەدا گورزی سەربازی لە ئێران بوەشێنن، ئەوەتا لەوەتەی تاران هەڕەشەی داخستنی گەروی هورمز دەکات، ئەمریکاو ئەوڕوپا دەستیان لەنێو هەنبانەکە گیر بووە، ئەگەر بێدەنگ دەبن وەی، ئەگەر وەدەنگ دێن دووجار وەی.. چونکە لەوانەیە قامێکی شەڕی ئاشكرا لە لوبنانەوە تا ئێران دژ بە ئەمریکا و هاوپەیمانانی دەست پێبکات. هەرچەندە ئێستا بە نهێنی شەڕی نێوان ئێران و ئەمریکا دەستی پێکردوە، بەڵام ئەمریکا بوێری ئەوەی تێدا نیە ئەوەی بن بەڕێ بهێنێتە سەر بەڕێ.

پڕۆفایل

ساڵی 1964 هاتوومهته ژیان . .. قۆناغهکانی سهرهتایی و ناوهندی و ئامادهییم له ههولێر خوێندووهو دواتر له کۆلیژی ئهندازیاریی زانکۆی سلێمانی وهرگیراوم ، لهگهڵ گوێزرانهوهی زانکۆی سلێمانی هاتوومهتهوه ههولێر و ئاکام له زانکۆی سهلاحهدین بڕوانامهی (بهکالۆریۆس)م وهرگرتووە.

ساڵی 1977 له ریزی بزووتنهوهی سۆسیالیستی کوردستاندا ههنگاوی یهکهمی تێکۆشانی سیاسیم ههڵێناوهتهوه .دوای تهواوکردنی زانکۆ چوومهته شاخ و چهکی پێشمهگایهتیم کردۆته شان و سهرهتا له ریزی حزبی سۆسیالیستی کوردستان و دواتریش له ریزی پارتی گهلی دیموکراتی کوردستاندا تێکۆشاوم و له راپهڕینی بههاری 1991 دا به زێد و شارهکهم شاد بوومهتهوه. . تاکه ئهندامێکی سهرکردایهتی حزبی یهکگرتنی کوردستان بووم که ساڵی 1993 لهگهڵ دهستهیهک کادری حزبی یهکگرتن ماوینهتهوه و حزبی رزگاریی کوردستانمان راگهیاندووه. ههرچۆن ساڵی 1977 دهستم به تێکۆشانی سیاسی کردووه و بێ پسانهوه تا ئهمرۆ تێیدا بهردهوامم.

لە ساڵی ١٩٧٧ دەستم بە نووسین کردوە، سەرەتا بەرهەمەکانم لە بڵاوکراوەکانی سەردەمی شاخ بڵاو دەکرانەوە، لەنێوان ساڵانی ١٩٨٠ تا ١٩٨٩ دوو کۆمەڵە چیڕۆک و چەند نامیلکەێکی هۆنراوەیی و چەند نامیلکەیەکی سیاسیم رۆشناییان بینی، رۆمانی نۆژەن کە ساڵی ١٩٨٨ نووسرابوو لە ساڵی ٢٠٠٥ چاپ کرا. دە ساڵ دەبێ کە رۆمانێک و دوو کۆمەڵە چیڕۆکم بۆ چاپ ئامادەن، بەڵام دەرفەتی چاپ کردنیان نەڕەخساوە.

ماوەیەک ئەندامی دەستەی بەڕێوەبەری یەکێتیی نووسەرانی کوردستان بووم، ماوەیەکیش ئەندامی کۆنسەی بەڕێوەبەری کۆنگرەی نەتەوەیی کوردستان بووم. ئێستا سکرتێری گشتی حزبی رزگاریی کوردستانم.

ئامادەکردنی:

حەمەزاهیر