حزبی رزگاریی هەڵناوەشێتەوە، بەڵام چەند هەڤاڵێک سەنگەری خەبات بۆ ناو یەکێتیی نیشتمانیی کوردستان دەگوازنەوە

لە لاپەرە ٣ی ژمارە ٧٧٨ی رۆژی ٣٠-١٠-٢٠١١ی رۆژنامەی هاوڵاتیدا، هەواڵێک لەژێر ناوی { بەهۆی بڕینی مینحەکەیانەوە حیزبی رزگاریی لەناو یەکێتیدا خۆی حەل دەکات} بڵاو کراوەتەوە، ئێمە بە پێویستی دەزانین ئەو راستیانە بۆ خوێنەران و نووسەرانی هاوڵاتی روون بکەینەوە:

1- حزبی رزگاریی کوردستان هەڵناوەشێتەوە، بەڵکو کاک زەید مەحمود عەلی لەگەڵ چەند هەڤاڵێکی دیکەدا سەنگەری خەبات بۆ ناو یەکێتیی نیشتمانیی کوردستان دەگوازنەوە، راستیەکەی رۆژی ١٧-٥-٢٠١١ لە ئاکامی رێککەوتنێکەوە، بەناوبژیوانی مەکتەبی پەیوەندیەکانی نیشتمانی و کوردستانی پارتی دیموکراتی کوردستان لەگەڵ کاک زەید مەحمود رێککەوتینەوە ، بەوهۆیەوە  وەک جێگری سکرتێر دەستنیشان کرا.

2- کاک زەید مەحمود عەلی ساڵی ١٩٩٤ هاتە ناو حزبی رزگاری، دوای شەش مانگ لە رزگاری دابڕا، بەڵام خۆی وەک باڵێک دەناساند، بەوهۆیەوە لە سەرەتای ساڵی ٢٠١٠ بودجەی حزبمان راگیرا، گوشاری زۆرمان لێکرا کە دەبێ لەگەڵی رێکبکەوین، سەرنجام رێککەوتین بەڵام تا ئێستا بودجەکە نەگەڕاوەتەوە ، ئەویش بڕیاریدا کە سەنگەری خەبات بگوازێتەوە .

3- لە ١-١-٢٠١٠ لە  سێهەمین کۆنگرەی حزبی رزگاریی کوردستاندا چەند هەڤاڵێک بۆ کۆمیتەی ناوەندی هەڵبژێردران، ئەوکاتە ناوی ئەو هەڤاڵانەمان بۆ راگەیاندنەکان و بۆ لایەنە سیاسیەکان ئاشکرا کرد، ئێستا تەنیا دوو هەڤاڵی  سەرکردایەتی هەڵبژێردراوی سێهەمین کۆنگرە لەگەڵ کاک زەید مەحمود سەنگەری خەبات دەگوازنەوەو ماڵئاوایی لە ماڵی رزگاری دەکەن .

4- هەڵوەشاندنەوەی حزب لە دەستەڵاتی کۆنگرەدایە، لەو رێککەوتنەی لەگەڵ کاک زەید مەحمود ئیمزامان کردوە خۆی داوای کردوە تا شەش ساڵی دیکە کۆنگرە نەبەسترێت، کەواتە بە رۆیشتنی کاک زەید و چەند هەڤاڵێکی دیکە حزب هەڵناوەشێندرێتەوە و  وەک جاران درێژە بە خەباتی خۆی دەدات.

5- حزبایەتی کارێکی ئازادو ئارەزوومەندانەیە، هەڤاڵان لە وازهێنان و سەنگەر گواستنەوەدا ئازادن، بەوهۆیەوە ئەوانەی سەنگەری خەبات دەگوازنەوە پیرۆزباییان لێدەکەین و هیوای سەرکەوتن و ژیانێکی باشتریان بۆ دەخوازین.

مەکتەبی سیاسی

حزبی رزگاریی کوردستان

٣١-١٠-٢٠١١