حكومەتی هەرێم پلان بۆ دەرهێنانی یۆرانیۆم دادەنێت

رۆژنامەی هاوڵاتی بە مانشێتی سەرەكی خۆی نوسیویەتی "حكومەتی هەرێم پلان بۆ دەرهێنانی یۆرانیۆم دادەنێت" رۆژنامەكە لەو هەواڵەیدا كە تایبەتە بەخۆیان و نوسیویانە بەپێی پڕۆژە پلانی گەشەپێدانی ستراتیژی چوار ساڵی ئایندە حكومەتی هەرێم بونی یۆرانیۆمی لە خاكی هەرێم تۆمار كردووە و كار بۆ دەرهێنان و سود وەرگرتن لێی دەكات. رۆژنامەكە لە راپۆرتێكیدا كە لە لاپەرەی چوارەمی بڵاوی كردووەتەوە بە درێژی باسی ئەم بابەتەی كردووە رۆژنامەكە باسی لەو مادەیە كردووە و بە پێی ئەو پرۆژە پلانەی حكومەتی هەرێم بۆ چوار ساڵی ئایندە ئامادەی كردووە لە "پارێزگای دهۆك مادەكانی كاربۆن، خارسین، یۆرانیۆم هەیە" ئاماژە بەوەشدەكات كە زۆرینەی ئەو كانزایانە ئامادەكاری دەرهێنانیان بۆنەكراوە و ئاماژە بە گرنگی ئەو كانزایانەش دەكات. هەواڵەكەی هاوڵاتی كە لە ژمارەی (807)ی دا بڵاوی كردووەتەوە باسی لەو كۆنگرەیە كردووە كە (16/12/2010) لە هەولێر بەستراوە لەلایەن دەستەی عەرەبیەوە بۆ وزەی ئەتۆم بە دروشمی (ئەتۆم لە خزمەت مرۆڤ) رۆژنامەكە باس لەوەدەكات كە ئەندامێكی لیژنەی وزەی ئەتۆمی عێراقیش ئاشكرای كردووە "هەرێمی كوردستان 14 داواكاری پێشكەشی ئاژانسی نێودەوڵەتی وزەی ئەتۆمی سەر بە نەتەوە یەكگرتووەكان كردووە بۆ بەكارهێنانی ئەو وزەیە لە بواری مەدەنیدا".

ئەندامێكی لیژنەی پیشەسازی و وزە و سەرچاوە سروشتیەكان لە پەرلەمانی كوردستانیش رەتی كردووەتەوە كە لیژنەكەیان ئاگاداری ئەو پلانەی حكومەت بێت و بۆ هەر مامەڵەكردنێك لەگەڵ پۆرانیۆمدا. ناسك تۆفیق لەو لێدوانەیدا بۆ (هاوڵاتی) وتویەتی هەر سەرچاوەیەكی سروشتی ئەگەر وەكو نەوتی هەرێم مامەڵەی پێوە بكرێت نەزانرێت داهاتەكەی و خەرجیەكەی چەندە بارگرانی بۆ هەرێم دروست دەكات. هاوكات د. بایەزید حەسەنیش كە ئەندامی لیژنەی نەوت و وزەیە لە ئەنجومەنی نوێنەرانی عێراق لە لێدوانێكیدا وتویەتی "حكومەتی هەرێم تەنها دەتوانێت كەرەستە خاوەكەی پۆرانیۆم دەربهێنێت، چونكە هیچ كۆمپانیا و وێستگەیەكی نیە بۆ بەرهەم هێنانی".