دادگەی سلێمانی، سکاڵاێکی هەڤاڵ رێکار ئەحمەد ئەرێنی دەکات

ئەمڕۆ ١٩-١٢-٢٠١١ دادوەری کەتنی ٣ لە دادگەی کەتنی سلێمانی، لەسەر سکاڵاێکی هەڤاڵ رێکار ئەحمەد، سکرتێری گشتی حزبمان، حزبی رزگاریی کوردستان ، سزای چوار مانگ زیندانی بۆ یەکێک لەو کەسانە بڕیەوە کە لە راگەیاندنەکاندا هەوڵی ناوزڕاندنی دەدا.

دادگەی کەتن لە پاریزگای سلێمانی بڕیاری دا کە فەهمی محەمەد حەسەن، چوار مانگ زیندانی بکرێت، بەڵام سزاکە تا سێ ساڵی دیکە رادەگیرێت و جێبەجێ نەکرێت، ئەگەر لەماوەی سێ ساڵی داهاتوودا هەر سزاێکی دیکە بەسەریدا بسەپێندرێت ئەو چوار مانگەیشی دەچێتەسەرو جێبەجێ دەکرێ.

لە ساڵانی رابردوودا لە رێی جۆراوجۆرەوە هەڤاڵ رێکار ئەحمەد کرابوو بە ئامانج و بەناڕەوا هێرشی راگەیاندنی دەکرایە سەر و هەوڵی ناوزڕاندنی دەدرا، ئەویش بۆ رێگرتن لەو هێرشە ناڕەواو بێبنەمایانە پەنای بۆ دادگە دەبرد، یەکێک بە ناوی فەهمی محەمەد حەسەن لە ساڵی ٢٠٠٨ لە چەندین بڵاوکراوەدا بۆختانی ناڕەوای بۆ هەڤاڵ رێکار ئەحمەد سکرتێری گشتی حزبی رزگاریی کوردستان هەڵبەستبوو، دادوەری کەتنی ٣ لە دادگەی کەتنی پارێزگای سلێمانی لەهەمبەر یەکێک لەو سکاڵایانە ئەو بوختانانەی بە ناوزڕاندن و بێڕێزیکردن بە کەسایەتی سکاڵاکار ناساندو بە پێی ماددەی ٤٣٣ لە یاسای سزادان، فەهمی محەمەد حەسەنی تاوانباری سزاداو مافی ئەوەیشی بە سکاڵاکار (رێکار ئەحمەد) دا تا لە دادگەی مەدەنیدا داوای قەرەبووی لێبکات.

ماڵپەڕی رزگاری

١٩-١٢-٢٠١١