کاتژمێر ٩ی رۆژی سێ شەممە، رێکەوتنی ٢٣-١٠-٢٠١٢، کۆمیتەی باشووری رێکخراوی چاودێری کوردۆساید، سێهەمین کۆنفرانسی خۆی لە شاری هەولێر بەبەشداری نوێنەری سەرۆکی حکومەت و وەزیری کاروباری شەهیدان و ئەنفالکراوان پێکهێنا، هەروەها شاندێکی حزبمان، حزبی رزگاریی کوردستان بەشداری لە کۆڕی یەکەمی کۆنفرانسەکەدا کرد و پەیامی پیرۆزبایی مەکتەبی سیاسی گەیاندە بەڕێوەبەرانی کۆنفرانسەکە کە ئەمەش دەقەکەیەتی:

بەڕێزان! ئەندامانی سێهەمین کۆنفرانسی رێکخراوی چاودێری کوردۆساید

سڵاوی رزگاری و سەرخۆبوونتان لێ بێ..

لە پێوەند بە پێکهێنانی سێهەمین کۆنفرانسی رێکخراوی چاودێری کوردۆساید، پیرۆزباییتان لێدەکەین، دەخوازین کۆنفرانسەکەتان سەرکەوتوانە کارەکانی خۆی کۆتا بکات، بڕیار و راسپاردەی پێویست و گونجاو وەربگرێ کە لەگەڵ رەوشی هەنووکەیی دۆزی رەوای گەلی کوردستان و پێشکەوتنەکانیدا بێتەوە.

بەڕێزان! جێی شانازیە کە لەماوەی ساڵانی رابردوودا، ئێوەی تێکۆشەر لە رێکخراوی چاودێری کوردۆساید نەویستانە و لەخۆبردوانە چالاکیتان کردوەو تێکۆشاون، بەوهۆیەشەوە دۆزی رەوای گەلی کوردستان لەناوەندە نێودەوڵەتیەکاندا باشتر ناسراوە، هاوسۆزو پشتیوانی زۆرتری بۆ پەیدا بووە، بەوهۆیەوە دەخوازین کە لەداهاتوودا شێلگیرانەو لێبڕاوانەتر درێژە بە کارو چالاکیەکانتان بدەن.

لە دویماهیدا سڵاو و پیرۆزبایی خۆمان دووپات دەکەینەوە، هیوای سەرکەوتن بۆ کۆنفرانسەکەتان و بۆ رێکخراوی چاودێری کوردۆساید دەخوازین.