نامەیەکی کراوە بۆ کاک بەختیار سەعید

سڵاوی رزگاری و سەرخۆبوونت لێبێ.

دوێنێ لە کەناڵی ئاسمانی (ئێن ئاڕ تی NRT)یەوە گوێم لێبوو کە دەتگوت: (هەموو ئەو حزبانەی کە باسیان دەکەین، بە حزبە بچکۆلەکان، ئەمەیان زۆربەیان دەستکردی یەکێتی و پارتین، دروستیان کردن لە حالەتی زەرورا بەکاریان بێنن!!)، بە حوکمی ئەوەی کە حزبی رزگاریی کوردستانیش بەهۆی گوشارە بەردەوامەکانەوە هەر بە حزبی بچووک پێوانە دەکرێ، بۆیە بە پێویستم زانی لە رێی ئەم نامەیەوە وەڵامت بدەمەوە:

بەڕێز کاک بەختیار سەعید! لە وڵاتانی جیهاندا حزب بە بچووک و گەورە ناودێر ناکرێن، بەڵکو بە حزبی دەستەڵاتدارو ئۆپۆزیسیۆن، بە حزبی عەلمانی و دینی، بە حزبی پێشكەوتنخواز و کۆنەپارێز، بە حزبی راست و چەپ، یان بە حزبی نەتەوەیی و نێونەتەوەیی ناودێر دەکرێن، بەڵام ناوبردنی حزبەکان بە گەورەو بچووك لەژێر کاریگەرێتی راگەیاندنی حزبە دەستەڵاتدارەکان و مێدیاکانی سێبەر دایە. ئەمەش خۆی لە خۆیدا رەوایەتی دانە بە سیاسەت و ئەجێندای حزبە دەستەڵاتدارو دەستڕۆیشتووەکان.

بەڕێز کاک بەختیار! کەسانێک کە بە رۆشنبیرو رۆژنامەوان بناسرێن و لە بەرەی گەل دابن هەرگیز ئەو دەستەواژەو توانجانە دووپات ناکەنەوە کە دەستەڵاتداران بۆ سوک کردنی دیتران بەکاری دەهێنن، بەڵام ئاساییە ئەگەر کەسانی راسپێردراو بێباکانە هەوڵی بێزراوبوون و ناشیرینکردنی تێکۆشەرانی راستین و لایەنە سەربەخۆکان بدەن، دەنا هەرگیز لۆژیک نیە کە هەموو حزبە بچووکەکان دەستکردی یەکێتی و پارتی بن.

بەوهۆیەی کە من سکرتێری گشتی حزبی رزگاریی کوردستانم و ئاگام لە مێژووی حزبی رزگاریی کوردستان هەیە، راشکاوانە ئەو تۆمەتەی ئێوە رەت دەکەمەوە، چونکە کوردستانیان و ئێوەش باش دەزانن لە کاتێکدا حزبی رزگاریی کوردستان لە ١٥-٨-١٩٩٣ راگەیەندرا کە گۆڕەپانی سیاسی لە باشووری کوردستان بەرەو دوو جەمسەری دەڕۆیشت، لەلایەکەوە گرەو لەسەر راکێشان و تواندنەوەی حزبەکان دەکرا، لەلایەکی دیکەشەوە هەڵپەی گەیشتن بە پلەو پایە و خۆدەوڵەمەندکردن لە لووتکەی هەڕمێنی خۆیدا بوو، کەچی ئەوێ رۆژێ، ئێمە، تێکۆشەرانی سەردەمی شاخ شەقمان لە بەرژەوەندیە کەسێتیەکان هەڵداو لە داوی تامیکردن نەکەوتین و سەربەخۆیی خۆمان پاراست، هەروەها بە درێژایی ساڵانی شەڕی نێوەخۆیش، حزبی رزگاریی کوردستان لە تاقیکردنەوەکاندا سەرکەوتوو بوو، لاگیری لە سەنگەرەکانی شەڕی نێوەخۆدا نەکرد، بەوهۆیەوە چەندین کێشەو گرفتی بۆ دروست کرا، لەمبەرو لەوبەر فۆتۆکۆپیان بۆ دروست کرد، باشە ئەگەر دروستکراوی یەکێتی و پارتی بووایە، خۆ ئەگەر هاوکاریش نەکرابا، لانیکەم کێشەی بۆ دروست نەدەکراو فۆتۆکۆپی لێهەڵنەدەگیرایەوەو هەوڵی سڕینەوەو کلۆرکردنی نەدەدرا.

کاک بەختیاری خۆشەویست! هەڵبەت رۆشنبیران و رۆژنامەوانان دەزانن کە حزبی رزگاریی کوردستان هەرگیز دەنگی خۆی نەفرۆشتووە، لە هیچ هەڵبژاردنێکدا لەگەڵ لیستی لایەنە گەورەکاندا نەبووە، لە هەڵبژاردنی ١٩٩٢ ئێمە خۆمان پارتی گەل بووین و لیستی فیدراڵیمان هەبوو، لە هەڵبژاردنی ٢٠٠٥ لیستی هاوبەشمان لەگەڵ حزبی زەحمەتکێشانی کوردستاندا هەبوو، لە هەڵبژاردنی ٢٠٠٩دا لەگەڵ لیستی ئازادی و عەدالەتی کۆمەڵایەتی دابووین، لە هەڵبژاردنی ٢٠١٣یشدا حزبی رزگاری بە لیستی سەربەخۆی خۆی بەشداری لەهەڵبژاردنەکاندا کرد، ئەی کەواتە لە کوێ بۆ زیادکردنی دەنگی حزبە گەورەکان لە هەڵبژاردنەکاندا بەشداربووین؟؟!!

بەڕێز کاک بە ختیار! رۆشنبیرو رۆژنامەوانی راستین و نیشتمانپەروەر دەبێ ئاگای لە رەوتی رووداوەکان هەبێ، دەبێ ئاگای لە مێژووی دوێنێ و پێرێ هەبێ، لەو سۆنگەیەشەوە دەبێ بەڕێزتان ئاگاتان لە رابردووی حزبەکان هەبووبێ. هەڵبەت دەبێ بشزانن لە ساڵی ١٩٩٣ تا ئەمڕۆ چەندین کێشەو گرفت رووبەڕووی حزبی رزگاریی کوردستان کراونەتەوە، دەزانیت کە حزبی رزگاری یان بودجەی نەبووە یان بودجەێکی یەکجار کەمی پێدراوە، هەروەها گەمەی بودجە بڕینی لەگەڵدا کراوە و سزا دراوە.

لەلایەکی دیکەشەوە هەمووان گلەیی و گازاندەیان لە کۆمیسیۆنی باڵای هەڵبژاردنەکاندا هەیەو بە لاگیریان دەزانن، لە هەڵبژاردنی ٢٠١٣، زۆرینەی هەرە زۆری لیستەکان بە ئاکامی هەڵبژاردن رازی نەبوون، تانەیان لێداو سکاڵایان لە دژدا تۆمار کرد، ئەگەروایە بەڕێوەبردنی هەڵبژاردن لە رەوشێکی ئاوادا چ واتاێک دەبەخشێ؟!، بە قسەی خۆتان حزبە بچکۆلەکان بۆچی بەشداری لەهەڵبژاردندا بکەن، خۆیان خەریک و ماندوو بکەن؟!

بەڕێز کاک بەختیار! ئەرکی رۆشنبیرانی وڵاتپارێزە لە هەمبەر رووداوەکاندا بێنە دەنگ و رای خۆیان بڵێن و بۆچوونەکانیان بۆ جەماوەر خۆیا بکەن، بەڵام دەبێ بە ئامانجی خستنەڕووی راستیەکان و بۆ قازانجی گشتی بێ، نەک بریکاری کردن و هەڵڕشتنی رامانی دیتران.

رێکار ئەحمەد

سکرتێری گشتی حزبی رزگاریی کوردستان

٢٦-٣-٢٠١٤