بەهەرێمبوونی پارێزگاکان بە زیانی کوردستان تەواو دەبێت

بەرپرسێک لە حزبی رزگاریی کوردستان بە ماڵپەڕی رۆژی گەلی گوتوە : بەهەرێمبوونی پارێزگاکان جگە لە زیان هیچ سوودێک بە هەرێمی کوردستان ناگەیەنن.

بەرپرسەکە جەختی کردۆتەوە کە ئەگەر عێراق ببێ بە دوو هەرێمی فیدراڵی و سەرچاوە لە دوو نیشتمانی کوردستان و عێراقی عەرەبی وەربگرێت لەبەرژەوەندی داهاتووی عێراق و ناوچەکەدایە، تەنانەت ئەگەر عێراق ببێ بە سێ هەرێم هێشتا تایبەتمەندێتی بۆ کوردستان دەمێنێتەوە، بەڵام ئەو هەراو هۆریایەی کە ئێستا لە بەهەرێمبوونی پارێزگای سەلاحەدین دەستی پێکردوەو شیمانەی ئەوە دەکرێ کە هەندێک پارێزگای دیکەش بگرێتەوە بە زیانی هەرێمی کوردستان تەواو دەبێت، تایبەتمەندێتی کوردستان بەرەو پوکانەوە دەبات و کەمبایەخی دەکات، هەروەها کێشەی ناوچە دابڕێندراوەکان سەخت و دژوارتر دەکاتەوە، بەهۆیەوە دەبێ سەرکردایەتی کوردستان بەهیچ شێوەیەک پشتیوانی لە هەرێمبوونی پارێزگاکان نەکات، بەڵکو کار بۆ ئەوە بکات تاوەکو عێراق ببێ بە دوو یان سێ هەرێمی فیدراڵ و رێ خۆشکەربێت بۆ سێ دەوڵەتی کۆنفدراڵی، چونکە لەو رێیەوە کێشەو ئارێشەکانی عێراق چارەسەر دەبێت، چونکە لەوەتەی دەوڵەتی عێراق بەو سنوورەی ئێستایەوە لە دوای یەکەمین جەنگی جیهان دروست بووە، پێیەوە دەناڵێنێ. راستیەکەشی لەلایەن براوەکانی یەکەمین جەنگی جیهان، عێراق لەسێ ویلایەتی موسڵ و بەغدادو بەسرە دروست کراو، لە دروستکردنیشیدا پرس بە دانیشتوانەکەی نەکرا.

بەرپرسەکەی حزبی رزگاری دووپات دەکاتەوە کە تێکۆشان بۆ پێکهێنانی دەوڵەتی سەربەخۆی کوردستان، خەباتێکی راستین و رەوایە، بۆ ئەو ئامانجەشەوە حزبی رزگاریی کوردستان و دەیان حزبی دیکە دامەزراون و درێژە بەخەباتی خۆیان دەدەن.