پەیامی پیرۆزبایی

بەڕێز مام خدر ڕووسی، سکرتێری گشتی بزووتنەوەی دیموکراتی گەلی کوردستان

بەڕێزان ئەندامانی مەکتەبی سیاسی و کۆمیتەی ناوەندی بزووتنەوەی دیموکراتی گەلی کوردستان

سڵاوی رزگاری و سەرخۆبوون..

لە پێوەند بە حەڤدەهەمین ساڵیادی دامەزراندنی بزووتنەوەی دیموکراتی گەلی کوردستان، بە ناوی خۆم و لە جیاتی هەڤاڵانم لە سەرکردایەتی حزبی رزگاریی کوردستان جوانترین پیرۆزباییتان لێدەکەم، لە رێی ئێوەی تێکۆشەریشەوە پیرۆزبایی لە سەرجەم کادرو ئەندامانی بزووتنەوە خەباتگێڕەکەتان دەکەم، دەخوازم کە هەم بە خۆشیەوە ئەو یادە بکرێتەوە، هەم ئێوەش لەشساغ و سەرفراز بن.

ئەمڕۆ لە ٢٥ی ئاب کە ئێوەی تێکۆشەر یادی دامەزراندنی بزووتنەوەکەتان دەکەنەوە، هێشتا کێشەکانی نێوان حکومەتی هەرێم و حکومەتی ناوەند درێژەیان هەیەو رێگەچارەێکی شیاو بۆ یەکلاکردنەوە بەدی ناکرێ، هێشتا هەنگاوی کردەیی بۆ گێڕانەوەی ناوچە دابڕێندراوەکان لە ئاسۆدا لێڵ دەنوێنێ و ماددەی ١٤٠ بە فەرامۆشی سپێردراوە، لە نێوخۆی باشووری کوردستانیشدا خزمەتگوزاریە بنەڕەتیەکان وەکو پێویست نین، بەڵێنەکانی چاکسازی هەنگاوی کردەییان بۆ هەڵنەگیراوەتەوە، ئەمەش وا دەخوازێ کە جارێکی دیکە هێزو لایەنە سیاسیەکان کۆببنەوەو هاوڕامانی پێشان بدەن، لەلایەکی دیکەشەوە رۆژئاوای کوردستان لە رەوشێکی تایبەتدایەو بەرەو سەرکەوتنی یەکجارەکی هەنگاو هەڵدەگرێتەوە، کەچی داگیرکارانی کوردستان بەتایبەتیش دەستەڵاتدارانی تورکیا بۆ شەڕی کورد بە کورد بەرنامە رێژیان کردوە، ئەمەش وادەخوازێ کە لەلایەن هێزەکانی کوردستان بە وردی هەڵوێستەی لەسەر بکرێ، بە هۆشیاریەوە رەفتاری لەگەڵدا بکرێ و بەیەکگرتوویی ئەو پیلانە پوچەڵ بکرێتەوە.

لەکۆتاییدا جارێکی دیکەش سڵاوو پیرۆزبایی خۆمان دووپات دەکەینەوە و جەخت لەسەر پێوەندی نێوان حزبی رزگاری و بزووتنەوەی دیموکراتی گەلی کوردستان دەکەینەوە.

رێکار ئەحمەد

سکرتێری گشتی

حزبی رزگاریی کوردستان

٢٠-٠٨-٢٠١٢