بەرەو ساڵی نوێ

ساڵی ٢٠١٨ تەنیا چەند رۆژێکی کەمی ماوە، ماڵئاوایی دەکات و ساڵی ٢٠١٩ دێ، بەوبۆنەیەوە پیرۆزبایی لە کوردستانیان دەکەین و دەخوازین کە ساڵی نوێ پڕاوپڕ لە خێرو خۆشی بێ و کۆتایی بە نەهامەتی و کارەساتەکان بهێنێ و دەروازەیەک بەرووی بەختەوەری کوردستانیاندا بکاتەوە.

کاتێک کە ماڵئاوایی لە ساڵی ٢٠١٨ دەکەین، دەبێ چاوێک بە رابردوودا بخشێنین و هەندێک لە رووداوەکان هەڵبسەنگێنین، لەهەمووشیان گرنگتر ئەو هەڵبژاردنە بوو کە لە کۆتایی مانگی ئەیلول لە باشووری کوردستان بەڕێوەچوو. شێوازی بەڕێوەچوونی هەڵبژاردنەکە نەک باری لاسەنگی راست نەکردەوەو هیواێکی نوێ بە کوردستانیان نەبەخشی، بەڵکو بەهۆی ئەو ساختەکاریە بەرفراوانەی کە ئەنجام درا، جارێکی دیکەش چرۆی هیواو ئاواتەکانی سیس کرد و بەشێک لە خەونی بەرەو دیموکراتیزەکردنی لە گۆڕنا. ئەو هەڵبژاردنەی کە بۆ پەرلەمانی کوردستان بەڕێوەچوو، رەوشی کوردستانی شێواترکرد، هەرچەندە تا ئێستا کابینەی نوێ پێکنەهاتووە، بەڵام ئاماژەکان نیشان دەدەن کە دەبێتە هۆکارێکی پتەو بۆ خۆسەپاندن و زیاتر بەرتەسک کردنەوەی ئازادیەکان و قوڵترکردنەوەی کێشەو گرفتەکانی کۆمەڵ. بەتایبەتیش ئەگەر هێزی ئۆپۆزیسیۆن خۆی لەسەر پێ رانەگرێ و بە داماوی و مەلولیەوە بەشداری لەو کابینەیەدا بکات.

لەلایەکی دیکەوە بینیمان کە لەساڵی ٢٠١٨ رۆژئاوای کوردستان دووچاری هێرش و پەلاماری داگیرکاری بۆوە، لە عەفرین بەرخۆدانی مەزنی مێژوویی بەڕێوەچوو، لەوانەیە لە مێژووی کوردستاندا بێوێنە بووبێ، هەرچەندە کە هێزی تورکیا و هاودەستانیان دوای ٥٩ رۆژ لە بەرخۆدان، توانیان کانتۆنی عەفرین داگیر بکەن، بەڵام تا ئەمڕۆکەش ئۆخەیان نەکردووە، رۆژانە رووبەڕووی گورزی شەڕڤان دەبنەوە، بەردەوام چالاکی شۆرشگێریان لە دژدا ئەنجام دەدرێ . وێڕای ئەو هەموو گوشارەش، کەچی رۆژئاوا قایم راوەستاو پێگەی خۆی پتەوتر کرد، هەم توانی لەسەر پێی خۆی رابوەستێ و هەمیش درێژەی بەشەڕی داعش و گروپە تیرۆریستیەکانی دیکە داو سەرکەوتنی وەدەستهێنا، وەلێ مخابن لە چەند رۆژی رابردوودا دۆناڵد ترەمپ، سەرکۆماری وڵاتەیەکگرتووەکانی ئەمریکا لە کردەیەکی چاوەڕواننەکراودا بڕیاریدا کە تەواوی سەربازەکانی وڵاتەکەی لە رۆژئاوای کوردستان بکێشێتەوە، هەرچەندە دەرچوونی سەربازانی ئەمریکا لە سوریا بە قازانجی تیرۆریستان تەواو دەبێ، ئەوەتا ئەردۆغان سەرکۆماری تورکیا هەڕەشەی لەنێوبردنی کورد دەکات و خۆی بۆ هێرش و پەلامار ئامادە دەکات، بەڵام شەڕڤانان بڕیاری خۆیان داوەو واز لە خەبات و تێکۆشانی رەوا ناهێنن. ئیدی لەو پێوەندەدا وادەخوازێ کە هەموو کوردستانیان دژ بە سوپای داگیرکار رابوەستن و رێی پێشڕەوی و لەشکرکێشی لێبگرن.

لە باکووری کوردستان و تورکیا بەهۆی سیاسەتی ملهوڕی و سەرەڕۆیی ئەردۆغان و ئەکەپە رەوشی ئابووری و سیاسی و کۆمەڵایەتی گورزی کاریگەری پێکەوتووەو رۆژ دوای رۆژیش بەرەو داڕمان دەڕوات. هەروەها لە رۆژهەڵاتی کوردستان و ئێرانیش بەهۆی ململانێی نێوان کۆماری ئیسلامی ئێران و ئەمریکا، رەوشی ئابووری داڕماوەو بژێوی خەڵک تێکچووە، بەتایبەتیش دوای دەرچوونی ئەمریکا لە رێککەوتنی هەستەیی لەگەڵ ئێران و سەپاندنی گەمارۆی جۆراوجۆری ئابووری، ئیدی نرخی دراوی ئێران لەبەرانبەر دراوەکاندا بەشێوەیەکی سەیر دابەزیووە، بەوهۆیەشەوە گرانی و نەداری بەرۆکی خەڵکی گرتووە.

بەخوێندنەوەی سەر پێییانەی رووداەکانی ساڵی ٢٠١٨ دەگەینە ئەو ئاکامەی کە ئەو ساڵە هیچ سوودێکی بۆ خەڵکی کوردستان نەبووە، بەوهۆیەوە رۆیشتنی ئەو ساڵە نەک هەر خەڵک نیگەران ناکات، بەڵکو گەل بە تامەزرۆوە باوەش بۆ ساڵی ٢٠١٩ دەگرێتەوە بە گەشبینیەوە لە داهاتوو دەڕوانێ.

ئێمە لە ماڵپەڕی "رزگاری"دا جارێکی دیکەش بەبۆنەی هاتنی ساڵی نوێوە پیرۆزبایی لە کوردستانیان بەتایبەتیش لە رزگاریخوازو سەربەخۆخوازان دەکەین. هیواخوازین کە ساڵی ٢٠١٩ بەشێک لە خەون و ئاواتەکان بەدێ بێن و کوردستان هەنگاوی خێراو بەرچاوتر بەرەو رزگاری و سەربەخۆیی هەڵبگرێتەوە.

ساڵی نوێ خۆشهاتی.