شکۆداربێت ١ی ئایار رۆژی جیهانی کرێکاران

کرێکاران! زەحمەتکێشان!

رۆژی یەکی ئایار وەک رۆژی هاوپشتی کرێکاران واتاو لێکدانەوەی خۆی هەیە، هەربۆیەش لەم رۆژەدا کرێکاران ، زەحمەتکێشان و ستەملێکراوانی جیهان رێز لە خەبات و قوربانیدانی چینی کریکاران دەگرن و یادی ئەو خەباتیگێڕانەی سەنگەری چینایەتی دەکەنەوە کە بۆ داهاتوێکی باشتر گیانی خۆیان پێشکەش بە مرۆڤایەتی کردوە . یەکی ئایار بۆ ئاهەنگ و هەڵپەڕین و خۆشی نیە، بەڵکو رۆژی نوێکردنەوەی پەیمان و درێژەدان بە تێکۆشانی چینایەتیە، هەروەها دژبە سەرمایەدارو چەوسێنەران سەکۆێکی دیکەی جۆشدانی خەبات و تێکۆشانی راستینە.

یەکی ئایار رۆژی موکڕبوون و سووربوونی خەباتی شۆڕشگێڕانەیە و مەزنێتی چینی کرێکاران پێشان دەدات، تێکۆشانی لێبڕاوانەیە بۆ وەدەستهێنانی ماف و ئازادیەکان و کۆتایهێنان بە چەوساندنەوەو گەیشتن بە وەکهەڤی و دادپەروەری و جیهانێکی بێچەوسانەوە.

لە رۆژی یەکی ئایاردا، ئێمە لە حزبی رزگاریی کوردستاندا لەکاتێکدا راشکاوانە پشتیوانی لە داخوازیە رەواکانی چینی کرێکاران دەکەین و خۆمان بەرێبواری کاروانی خەباتی نەپساوەی ئەوان دەزانین، لەهەمان کاتدا هیواخوازین کە یادی یەکی ئایار بۆ بەهێزکردن و یەکخستنی سەنگەری چینایەتی دەکار بکرێ، هەروەها دەخوازین کە زەحمەتکێش و چەوساوانی کوردستان، لایەنە چەپ و شۆڕشگێڕەکان و ئەوانەی بۆ دادپەروەری تێدەکۆشن لە دەوری یەکتر کۆببنەوەو هەرچی زووترە بۆ پێکهێنانی چەترێکی هاوبەش هەنگاو هەڵبگرنەوە، چونکە تا ئێستاش چەوساندنەوەو نابەراری شەپۆل دەدات، سەرمایەداران باکیان بە بژێوی کرێکاران نیەو بۆ زۆرکردنی سەرمایەکانیان لەهیچ شتێک سڵ ناکەنەوە، رۆژ دوای رۆژ جیاوازیەکان قوڵتر دەکەنەوە و بەرهەم و رەنجی کرێکاران هەڵدەڵووشن، بۆیە ئەرکی کرێکاران و زەحمەتکێشانی کوردستانە کە بۆ بنبڕکردنی ستەم و نابەرابەری شێلگیرانەو لێبڕاوانەتر تێبکۆشن، چونکە ستەم و چەوساندنەوە تەنیا بەخەبات و تێکۆشان کۆتاییان دێ، ماف و ئازادیەکانیش لەڕێی تێکۆشانەوە وەدەستدێن و مسۆگەر دەبن.

شکۆداربێت یەکی ئایار رۆژی جیهانی کرێکاران.

١-٥-٢٠١١ مەکتەبی سیاسی

هەولێر حزبی رزگاریی کوردستان