ساڵیادی راگهیاندنی حزبی رزگاریی کوردستان پیرۆز بێ

کۆمهڵانی ههراوی خهڵکی کوردستان!

ئەندامان و لایەنگرانی رزگاری!

له 15ی ئابی ئەمساڵدا، بیستەمین مۆمی راگەیاندنی حزبمان، حزبی رزگاریی کوردستان دادهگیرسێنین، بهوبۆنهیهوه پیرۆزبایی له خۆمان و له تێکڕای سهربهخۆخوازانی کوردستان دهکهین.

ئەمڕۆ کە ساڵیادی راگەیاندنی حزبی رزگاری دەکەینەوە، خۆشبەختانە باشووری کوردستان لە هەندێ بواردا پێشکەوتنی گەورەی بە خۆیەوە بینیوە، بەڵام هەست بە نائارامی دەکرێ، لەلایەکەوە کێشەکانی نێوان هەرێم و بەغداد قوڵتر کراونەتەوەو چارەنووسی ناوچە دابڕێندراوەکانیش ناڕوونە، لەلایەکی دیکەشەوە رەوشی مافی مرۆڤ لە ئاستێکی خراپ دایە، رۆژانە هەواڵی کوشتن و رفاندن و دۆزینەوەی تەرم و خۆسووتاندنی ژنان و تووندو تیژی دژ بە رەگەزی مێینە بڵاودەبێتەوە، گەندەڵی بە سیستەم دەکرێ و ناڕەزایەتی بەربڵاوتر دەبێتەوە، هەروەها ئازادی رۆژنامەوانی و رادەربرین بە یاسا سنووردار کراوە. ئێستا لە هەرێمی کوردستاندا بانگەشەی یەکڕیزی نێو ماڵی کوردەواری دەکرێ و لەراگەیاندندا واپێشان دەدرێ کە بەشداریپێکردن هەیەو پرسوراوێژ بە لایەنە سیاسیەکان دەکرێ، کەچی لە کردەوەدا سیاسەتی هاوێرکاری، نانبڕین و برسیکردن و گوشار خستنەسەر دیتران تووندتر کراوەتەوەو درێژەی پێدەدرێ، بەوهۆیەشەوە هەڕەشەێکی ئاشکرا لەسەر چارەنووس دروست کراوە.

ئەمڕۆ کە ساڵیادی راگەیاندنی رزگاری دەکەینەوە، رۆژئاوای کوردستان لە رەوشێکی ئاوارتەو ئومێدبەخش دایە، رابونی خەڵک و کۆنترۆڵکردنی بەشێک لە شارەکان هەنگاوی گەیشتن بە ماف و ئازادیەکانی نزیکتر کردۆتەوە؛ ئێمە لە حزبی رزگاریی کوردستاندا پیرۆزبایی لە گەلی رۆژئاوای کوردستان دەکەین و دەخوازین کە هێزە سیاسیەکان تەبایی و یەکێتی نێوانیان پتەو بکەن و هاوخەباتی لەگەڵ گەلانی ناوچەکە موکمتر بکەن، هەروەها پشتیوانی خۆمان بۆ خەباتی رۆژئاوای کوردستان دووپات دەکەینەوە. بزاڤی رزگایخوازی باکوری کوردستان بە رێبەرایەتی پارتی کرێکارانی کوردستان پێشكەوتنی گەورەی بە خۆیەوە بینیوە، لەسەر ئاستی تێکۆشانی چەکداریدا سەرکەوتنی گەورەی بەدەستهێناوە، لەبواری خەباتی دیموکراسیشدا هەنگاوی باشی بڕیوە و کوردستانیان هۆشیار بوونەتەوەو دەتوانن خاوەندارێتی لە چارەنووسی خۆیان بکەن، هەروەها کاروانی خەبات و تێکۆشان لە رۆژهەڵاتی کوردستان گەشتر خۆی دەنوێنێ و هیوا بەدواڕۆژ مەزنتر بۆتەوە، ئەگەر پەلەکانی بزاڤی رزگاریخوازی کوردستان هاوهەڵوێست بن، دەتوانرێ سوودو قازانج لەو گۆڕانکاریانە وەربگرین کە لە رۆژهەڵاتی ناڤین روودەدەن.

ئەمڕۆ کە ساڵیادی راگەیاندنی رزگاری دەکەینەوە، بەداخباریەوە دەڵێین سێ ساڵ لەمەوبەرو بەبێ هیچ ئاگادارکردنەوەو پێڕاگەیاندنێک، حکومەتی هەرێمی کوردستان بودجەی حزبمانی راگرت، بە درێژایی ئەو ماوەیە هەوڵی زۆرمان داوە تا بودجەکەمان بۆ بگێڕنەوەو ئەو کێشەیە نەخەینە مێدیاکانەوە، لە ساڵی رابردوو بەڕێزان وەزارەتی ناوخۆو وەزارەتی دارایی بە فەرمی داوایان لە سەرۆکایەتی ئەنجوومەنی وەزیران کرد کە بودجەی حزبی رزگاری بگێڕدرێتەوە، هەروەها لە کۆتایی مانگی شوباتی ئەمساڵیش سەرۆکایەتی هەرێم پێشنیاریکرد وەکو حزبە مۆڵەتپێدراوەکان رەفتار لەگەڵ حزبی رزگاریی کوردستان بکرێ و بودجەکەی بۆ بگێڕدرێتەوە کەچی

بە فەرامۆشی سپێردراوەو برسیکردن درێژەی پێدراوە. ئێمە لەکاتێکدا راگرتنی بودجە و برسیکردنی خۆوڵاتیان بە ستەم دادەنێین، لەهەمان کاتدا داوا دەکەین کە سەرۆکایەتی ئەنجوومەنی وەزیران چاوبخشنێتەوەو بودجەکەمان بۆ بگێڕێتەوە، چونکە داواکردنمان بۆ گێڕانەوەی بودجە مافێکی رەواو راستینە و ئیتر لێی بێدەنگ نابین. ئێمە پێمانوایە سیاسەتی برسیکردن و نانبڕینی خۆوڵاتیان تەنیا لە هەرێمی کوردستان و بەمەبەستی سیاسی برەوی پێدەدرێ، دەبێ تێبکۆشین تا ئەو ستەمە بنبڕ بکرێ؛ دەخوازین بودجە بە یاسایی بکرێ و پێوەرێک بۆ پێدانی دیاریبکرێ و چیتر مەیلداری و نزیکایەتی لە تەرخانکردنی بودجە کاری پێنەکرێ.

ئەمرۆ لە ١٥ی ئاب وەبیری دەهێنینەوە کە راگەیاندنی رزگاری لە 15-8-1993، سووربوون و درێژهدانی خهباتی سهربهخۆخوازانه بوو، موکڕبوون و پیداگریش بوو لهسهر دیاردهی فرهحزبی، هەروەها پێداویستیێکی بابهتی و مێژوویی تێکۆشان بوو، ئەمرۆش دووپاتی دەکەینەوە کە وێڕای کۆسپ و تهگهرەکان، وێڕای گوشاری بودجە بڕین، حزبی رزگاری درێژه بە کاروانی خۆی دەدات و سازش لەسەر ئامانج و ڕامان و هەڵوێستەکانی خۆی ناکات، تەنانەت ئەگەر رەوشەکە ناچارمان بکات بارەگا لە شارەکان دابخەین، کەچی دیسانەوە بەشێوازی دیکە لە خەبات و تێکۆشان بەردەوام دەبین.

ئەمڕۆ لە ساڵیادی راگەیاندنی رزگاری دا، سوپاسی ئەو کەس و لایەنانە دەکەین کە لە رابردوو دۆست و هاوکارمان بوون، بەڵام بەهۆی ئەزموون و گۆڕانکاریەکانی رابردوو، لەژێر رۆشنایی ئەو رەوشەی کە ئێستا باشووری کوردستان و خودی حزبی رزگاری پێیدا تێپەڕ دەبەن، چاو بە پەیوەندی لەگەڵ لایەنە سیاسیەکان دەخشێنینەوەو پێداچونەوە بۆ ریزبەندی دۆستەکانمان دەکەینەوە.

شکۆداربێت 15ی ئاب، ساڵیادی راگهیاندنی رزگاری.

سهرکهوتووبێ خهبات له پێناو کوردستانێکی سهربهخۆو گهلێکی بهختیاردا.

مهکتهبی سیاسی

حزبی رزگاریی کوردستان

15-8-2012