شاندێکی رزگاری سەردانی بزووتنەوەی دیموکراتی گەلی کوردستان دەکات

کاتژمێر ١١ی رۆژی ١٤-٥-٢٠١٢ هەڤاڵ رێکار ئەحمەد سکرتێری گشتی حزبمان، حزبی رزگاریی کوردستان بە یاوەری هەڤاڵ ئیبراهیم محەمەد ئەمین ئەندامی مەکتەبی پەیوەندیەکان سەردانی بارەگای مەکتەبی سیاسی بزووتنەوەی دیموکراتی گەلی کوردستانی کرد و لەلایەن بەڕێز مام خدر روسی سکرتێری گشتی و کاک خەلیل و کاک قەهار ئەندامی سەرکردایەتی بەگەرمیەوە پێشوازی لێکرا، ئەوسا لە دیدارێکی برایانەدا باس لە رەوشی هەنووکەیی کوردستان کرا، نائارامی و پشێویەکانی هەفتەی رابردووی شاری هەولێر بەبیرهێنرایەوە، هەردوولا جەختیان کردوە کە رێپێوان و خۆپێشاندان مافێکی رەوایە، بەڵام هێرشکردنە سەر تەلاری پەرلەمان، خواردنگە، یانە، نووسینگەی کەناڵەکان و زیان گەیاندن بە موڵکی گشتی تێکدان و گێرەشێوێنیە، دەبێ بەیاسا رێی لێبگیرێت.. تەنانەت هەموو ئەوانە رووبەرووی یاسا بکرێنەوە کە دەستیان لەهاندانی خەڵکدا هەبووە. لەلایەکی دیکەشەوە نیگەرانی خۆیان لەو هەڕەشانە دەربڕی کە هەندێک کەس و لایەن بەناوی داکۆکیکردن لە ئایین و پیرۆزیەکان هانی خەڵک دەدەن، ئەوەش خۆی لەخۆیدا مەترسی بۆ سەر ئازادیەکان و گیانی رۆژنامەوان و نووسەران و ئازادی رامان دروست دەکات، بۆیە دەبێ ریسوا بکرێ، هەر پێشێلکاریێک هەبوو دەبێ لە چوارچێوەی یاسا یەکلایی بکرێتەوە.

لەتەوەرێکی دیکەدا باس لە پەیوەندی نێوان لایەنە سیاسیەکانی کوردستان و بەڕێوەچوونی کۆنفرانسی نەتەوەیی ژنانی کوردستان کرا، هەردوولا ئاواتەخوازبوون کە کۆنفرانسی ژنان سەرکەوتوو بێ و ببێتە سەرەتاێکی باش بۆ پێکهێنانی کۆنفرانس یان کۆنگرەێکی نەتەوەیی سەرتاسەری کوردستانی.