داواكاری قوربانیانی چەكی كیمیاوی بە حكومەتی ئەڵمانیا دەدرێ

ئەمڕۆ چوارشەمە 12ی ئازار لە یادی تاوانی كیمیابارانكردنی شاری هەڵەبجە بە بەشداری ژمارەیەكی بەرچاو لە چالاكوانان و نوێنەری رێكخراو پارتە سیاسییەكان بۆ جاری سێیەم لە بەردەم كۆنسوڵگەری ئەڵمانیا لە شاری هەولێر كۆبونەوەیەك ئەنجامدرا , یاداشتنامەیەك ئاراستەی حكومەت و پەرلەمانی ئەڵمانیا لە رێگای كۆنسوڵگەری ئەڵمانیا لە شاری هەولێر كرا, هاوكات یاداشتنامەیەكیش لە یادەكە بۆ كەناڵەكانی راگەیاندن خوێنرایەوە كە پشتیوانی بوو لە داواكارییە هەنووكەییەكانی هاووڵاتیانی هەڵەبجە .

ئەوەی شایانی باسە بەڕێز ئیحسان وەلزی بەرپرسی پەیوەندییەكانی كۆنسوڵخانەكە داواكارییەكەی لە نوێنەری گردبونەوەكە وەرگرت و بڕیاری دا بیگەیەنێتە وەزارەتی دەرەوەی ئەڵمانیا و لە رۆژانی داهاتووشدا لە گەڵ شاندی خۆپیشاندەران بە فەرمی دابنیشن.

شیاوی باسە ئەم لایەنانە یاداشتنامەیەکیان ئیمزا کردبوو:

١-تۆڕی هاوپەیمانی رێكخراوە كوردستانییەكان لە پێناو دادگای تاوانی نێو دەوڵەتی (131 رێكخراو)

٢-تۆڕی هاوپەیمانی رێكخراوە كوردستانییەكان لە پێناو قەدەغە كردنی چەكی ئەتۆمی (23رێكخراو)

٣-رێكخراوی كوردستان بێ جینۆساید

٤-بزووتنەوەی گۆڕان

٥-پارتی ئایندەی كوردستان

٦-حیزبی زەحمەتكێشانی كوردستان

٧-پارتی چارەسەری دیموكراتی كوردستان

٨-حیزبی رزگاریی كوردستان

٩-حیزبی شیوعی كوردستان

١٠-یەكێتی گشتی قوتابیان

١١-تۆڕی هەماهەنگی رێكخراوە ئێنجیئۆكان ( 64) رێكخراو

١٢-رێكخراوی 12 سوارەی كوردستان

١٣-رێكخراوی راوێژكاریی یاسایی

دەقی یاداشتنامەکە:

بەڕێز: سەرۆك كۆماری ئەڵمانیای فیدراڵ

بەڕێز: سەرۆك وەزیرانی ئەڵمانیای فیدراڵ

بەڕێز: سەرۆكی پەرلەمانی كۆماری ئەڵمانیا

بەڕێز: باڵوێزی ئەڵمانیا لە كۆماری عێراق

پاش سڵاو

بەهۆی ئەوەی كۆمپانیاكانی ئەڵمانیا هاوشان لە گەڵ زۆربەی وڵاتانی ئەوروپا و ئەمەریكا و یابان و .... لە هەشتاكانی سەدەی رابردوو رۆڵیان هەبوو لە فرۆشتنی چەكی كیمیاوی بە رژێمی بەعسی روخاو, ئەویش ئەو چەكانەی لە قەڵاچۆكردنی هاووڵاتیانی كوردستان بەكار هێناو ئاكامەكەشی دەیان هەزار هاووڵاتی سڤیلی قوربانی بوو, نموونەیەكی دیاری تاوانەكانیش كیمیابارانكردنی شاری هەڵەبجە بوو, كە تا ئێستاش سەدان لەو قوربانیانە كە بە چەكەكانی ئێوە كیمیابارانكران بەدەم ئازارەوە دەتلێنەوە.

ئێمە ئەمڕۆ لە بەردەم كۆنسوڵگەری ئەڵمانیا لە شاری هەولێر كۆبوینەتەوە, وەك ساڵانی پێشوتر كۆمەڵێك داواكاری دەخەینە بەردەست ئێوەی بەڕێز, هیوادارین ئێوەی بەڕێز بە رۆڵی مرۆڤدۆستانەی خۆتان هەڵبستن لە پشتیوانیكردن لەم داواكارییانەو نەفرەت لەو مێژووە ناشرینەی رابردوو بكەن, داواكارییەكانمان بریتین لە:

- حكومەتی ئەڵمانیا بە فەرمی دان بە تاوانەكانی جینۆسایدی كورددا بنێت كە دادگای باڵای تاوانەكانی عێراقی دانی پێدا ناوە.

- حكومەتی ئەڵمانیا بەشداری بكات لە كەمكردنەوەی ئازاری بریندارانی چەكی كیمیاوی لە كوردستان بە چارەسەركردنیان.

- حكومەتی ئەڵمانیا لە رێگای كۆنسوڵگەری ئەڵمانیا لە شاری هەولێرەوە كار ئاسانی بكات بۆ كەسوكاری قوربانیان و بریندارانی چەكی كیمیاوی بۆ ئەوەی سەردانی وڵاتی ئەڵمانیا بكەن بۆ چارەسەركردن.