شاندێکی پارتی یەکێتی کورد سەردانی حزبی رزگاری دەکات

کاتژمێر ١٢ی رۆژی ١٠-٢-٢٠١٥ شاندێکی پارتی یەکێتی کورد لە سوریە کە پێکهاتبوو لە بەڕێزان (حەسەن سالح، مەعروف مەلا ئەحمەد و نەواف رەشید) ئەندامانی مەکتەبی سیاسی، لە شاری هەولێر، سەردانی بارەگای حزبی رزگاریی کوردستانیان کرد و لەلایەن هەڤاڵانی حزبی رزگاریی کوردستانەوە بە گەرمیەوە پێشوازیان لێکرا.

شاندەکەی پارتی یەکێتی کورد لە سوریە لەگەڵ هەڤاڵ رێکار ئەحمەد، سکرتێری گشتی حزبی رزگاریی کوردستان کۆبوونەوە، لە کۆبوونەوەکەدا باس لە رەوشی هەنووکەیی کوردستان بە تایبەتیش شەڕی داسەپاوی داعش دژ بە خەڵکی کوردستان کرا، هەردوولا هاوڕابوون کە هاوهەڵوێستی و یەکڕێزی کوردستانیان توانیویەتی داعش بە چۆک دابهێنێم بەوهۆیەشەوە هاوپشتی نێودەوڵەتی بۆ کوردستان دروستبووە، بۆیە زۆر پێویستە درێژەی پێبدرێ.

لەتەوەرێکی دیکە باس لە پێوەندیەکانی نێوان حزبی رزگاری و پارتی یەکێتی کورد لە سوریە کرا و جەخت لەسەر بەهێزکردن و قوڵکردنەوەی پێوەندی نێوانیان کرایەوە.