سەرۆکی هەرێم لەگەڵ لایەنەکانی دەرەوەی پەرلەمان کۆدەبێتەوە

کاتژمێر ١٥ی رۆژی ٦-٧-٢٠١٣، رێزدار کاک مەسعود بارزانی، سەرۆكی هەرێمی كوردستان لەگەڵ هێزو لایەنە سیاسییەكانی دەرەوەی پەرلەمانی كوردستان كۆبۆوە.

پاشنیوەڕۆی رۆژی شەممە، رێزدار مەسعود بارزانی سەرۆكی هەرێمی كوردستان، لە بارەگای تایبەتی سەرۆکایەتی هەرێم لەگەڵ سكرتێرو نوێنەرانی هێزو لایەنە سیاسییەكانی دەرەوەی پەرلەمانی كوردستان كۆبۆوە. كۆبوونەوەكەدا تایبەت بوو بە راوێژو راگۆڕینەوە سەبارەت رەوشی هەنووکەیی کوردستان و بڕیاری ئەم دواییەی پەرلەمانی كوردستان.

سەرۆکی هەرێمی کوردستان وێڕای ئەوەی بەگەرمی بەخێرهاتنی لە میوانەکانی کرد، داوای لێکردن کە راشکاوانە راو سەرنجی خۆیان لەو بارەیەوە بخەنەڕوو، ئامادەبووانی كۆبوونەوەكەش تێبینی و سەرنج و پێشنیارو بۆچوونەكانی خۆیان سەبارەت بە پرسی دەستوورو بارودۆخی ناوخۆیی كوردستان و دواین بڕیاری پەرلەمانی كوردستان لەسەر درێژكردنەوەی ماوەی سەرۆكایەتی و پەرلەمان خستەڕوو. لە تەوەرێکی دیکەدا باس لە سەردانی شاندی هەرێم بۆ بەغداد کرا.

جێی ئاماژەیە کە هەڤاڵ رێکار ئەحمەد، سکرتێری گشتی، حزبمان،حزبی رزگاریی کوردستان بە نوێنەرایەتی حزب ئامادەی کۆبوونەکە ببوو