هێرشکردنە سەر میتینگی ئامەد ریسوا دەکەین

بەداخەوە، ئێوارەی رۆژی ٥-٦-٢٠١٥، دوژمنانی نەتەوەی کورد، لە کردەیەکی ترسنۆکانەدا دوو بۆمبی چێنراویان لەنێو کۆبوونەوەی بەرفراوانی جەماوەری پارتی دیموکراتی گەلان (HDP ) لە شاری ئامەددا تەقاندەوە، مخابن بەوهۆیەوە چوار مرۆڤی سڤیل گیانی خۆیان لەدەستداو زیاتر لە چوارسەد کەسی دیکەش برینداربوون، ئێمە لەکاتێکدا زۆر بەتووندی ئەو کردەوە تیرۆریستیە ریسواو شەرمەزار دەکەین و نەفرەت لە تیرۆریست و تیرۆرپەروەران دەکەین، لەهەمان کاتدا سڵاو بۆ گیانی پاکی شەهیدەکان دەنێرین و هیوای هەرچی زووتر چاکبوونەوەش بۆ بریندارەکان دەخوازین.

هێرشکردنە سەر میتینگی هەدەپە لە شاری ئامەد یەکەمین کاری ترسنۆکانەی ناحەزانی ئاشتی و دوژمنانی کوردستان نیە کە دژ بە ئاشتیخوازانی باکووری کوردستان ئەنجام دەدرێ، پێشتریش چەندین هێرشی دیکە ئەنجام درابوون، تەنانەت رۆژی ٤-٦-٢٠١٥ ، توركە رەگەزپەرەستەكان بە بەرچاوی هێزەكانی پۆلیسی تورکیاوە، لە شاری ئەرزروم پەلاماری گردبوونەوەی هەدەپەیان دابوو، ئەو کردەوانەش بەمەبەستی لەباربردنی پڕۆسەی ئاشتی نێوان کوردو تورک ئەنجام دەدرێن، گەرەکیانە وەکو پێشوو ماف و ئازادیەکان لە کوردستانیان زەوت بکرێن، بەڵام گۆڕانکاریەکانی تورکیاو ناوچەکەو جیهان بە پێچەوانەی خواستی رەگەزپەرەستان و تیرۆریستان تەواو دەبێ، سەرەنجام دەوڵەتی تورک ناچار دەبێ کە هەنگاوی کردەیی بۆ ئاشتی لەگەڵ کورد هەڵبگرێتەوەو و کۆتایی بەو جەنگ و خوێنڕێژیە بهێنێ کە ماوەی سەد ساڵە دژ بە نەتەوەی کورد درێژەی پێدەدا، ئیدی ئەوجۆرە کردارانە کار لەسەر ورە و خۆراگریی هێزە ئاشتیخوازەکان ناکات چونکە ئازادیخواز و رزگایخوازانی کوردستان زۆر لێبڕاوانەترو شێلگیرانەتر بۆ وەدەستهێنانی ماف و ئازادیەکانیان تێدەکۆشن و بەگوڕتر لە جاران پارێزگاری لە خەڵک و خاکی نیشتمان دەکەن.

سەرکەوێ خەبات لە پێناو ئاشتی و ئازادی و سەربەخۆیی

نەفرەت لە تیرۆریست و دوژمنانی ماف و ئازادیەکانی خەڵکی کوردستان

پارتی سەربەخۆیی کوردستان حیزبی رزگاریی کوردستان

٦-٦-٢٠١٥