راگەیاندراوی هاوبەشی لایەنە سیاسیەکان

سەبارەت بە رەوشی هەنووکەیی باشووری کوردستان

بەمەبەستی تاوتوێکردنی رەوشی کوردستان و عێراق و ناوچهكه و پێشهاتە هەنووکەییەکان، چوارەمین کۆبوونەوەی هاوبەشی لایەنە سیاسیەکانی کوردستان لە شاری هەولێر، لهرێكهوتی 3/9/2014 لەبارەگای بزووتنەوەی دیموکراتی گەلی کوردستاندا بەڕێوەچوو، لایەنەکان رامان و لێکدانەوەی تایبەتی خۆیان خستەروو، بە پێویستی دەزانین ئاکامی کۆبوونەوەکە بۆ رای گشتی کۆمەڵانی خەڵک روون بکەینەوە:

١- ئێمە پێشتر رامانی خۆمان سەبارەت بە یاسای پێدانی بودجە بە حزبە سیاسییەکان راگهیاندبوو، رەتمان کردبۆوە، داواشمان لە بەڕێز سەرۆکی هەرێمی كوردستان کردبوو کە واژۆی لەسەر نەکات و رەوانەی پەرلەمانی بکاتەوە، بەڵام مخابن بێئەوەی رەوشی هەستیاری باشووری کوردستان لەبەرچاو بگیرێ، رۆژی ٣١ی ئاب واژۆی لەسەر کراوە، بەوهۆیەوە ئیدی دەکەوێتە واری کرداریەوە، ئێمە جارێکی دیکەش ئەو یاسایە رەت دەکەینەوە، نیگەرانی خۆشـمان سەبارەت بە واژۆکردنەکەی دەردەبڕین، چونکە یاساکە نادادپەروەرانەیەو پشێلکردنێکی ئاشکرای مافی مرۆڤ و لەژێرپێنانی مافی هاوڵاتیبوونە.

٢- پشتیوانی لە ناڕەزایەتیەکانی خەڵکی کوردستان لەپێوەند بە بەرزکردنەوەی نرخی بەنزین دەکەین، دەخوازین نرخی بەنزین بکرێتەوە بە ٥٠٠ دینار. راستییەکەی ناکرێ لە وڵاتێکی خاوەن نەوتدا نرخی بەنزین گران بێ و کوالیتی خراپ بێ و رێگەوبانیش وێڕان و بیمەش بوونی نەبێ.

٣-دەخوازین چاو بە سیستەمی خانەنشینکردن بخشێندرێتەوە، چونکە بەوهۆیەوە هەم ستەم لە تێکۆشەران کراوە، هەمیش ژمارەیەکی زۆر لە کەسانی بێ پێشینەو ماندوو نەبوو بە ناڕەواو لە خۆڕاوە خانەنشینکراون و کۆمەڵگە بەرەو مشەخۆری تاودراوە. بەتایبەتیش هەندێک لەوانەی لە رابردوودا هاوکارو هاودەستی رژێمی بەعس بوون و دژ بە بزووتنەوەی رزگاریخوازی کوردستان راوەستابوون، ئێستا بە پلەی بەرز خانەنشین کراون، دەخوازین بێمەرج ئەوانە دوور بخرێنەوە.

٤- پێدانی مووچە بە بندیواران تەنیا لەبەرژوەندی حزب و بەرپرسەکان دایە، بەهەدەردانی سامانی گشتیە، دەخوازین هەڵبوەشێندرێتەوە.

٥-چیتر خەڵک لە خۆڕاو بە ناڕەواو دانەمەزرێندرێن، ئەو لیستانەش هەڵبوەشێندرێنەوە کە لەم دواییانەدا بەبێ هاوڕک دامەزێندراون.

٥- کۆمەڵانی خەڵکی کوردستان دڵنیا دەکەینەوە کە ئامانجمانە راستگۆیانە نوێنەرایەتی ناڕەزایەتییەکانی ئەوان بکەین، رۆڵی ئۆپۆزیسیۆنێکی نیشتمانی راستهقینهو کاراو ئەرێنی بگێڕێن.

هەولێر ٣-٩-٢٠١٤

ناوی حزب و لایەنە بەشداربووەکان:

1- حزبی رزگاریی کوردستان

2- بزووتنەوەی دیموکراتی گەلی کوردستان

3- حزبی دیموکراتی بێت نەهرێن

4- یەکێتی نەتەوەیی دیموکراتی کوردستان YNDK

5- بزووتنەوەی ئاشتیخوازانی کوردستان

6- بزووتنەوەی دیموکراتی تورکمان لە کوردستان

7- پارتی پارێزگارانی کوردستان

8- بزووتنەوەی رزگاری دیموکراتی کوردستان

9- پارتی نەتەوەیی کوردستان

10- حزبی پێشکەوتنخوازانی دیموکراتی کوردستان

11- پارتی دیموکراتی تورکمانی کوردستان

12-پارتی برایەتی تورکمانی عێراق

13-حزبی ئیتحادی تورکمانی/ عێراق

14- پارتی پارێزگارانی دیموکراتی کوردستان

15- کۆمەڵەی لیبرالی تورکمان

16- پارتی رزگاری نەتەوەیی تورکمان

17- پارتی گەلی تورکمان

18- ئەنجوومەنی نەتەوەیی کلدانی

19- بزووتنەوەی تورکمانی بێلایەن

20- حزب الشروق الترکمانی