دیداری هاوبەشی نێوان حزبی رزگاری و پارتی کۆمۆنیستی کوردستان

کاتژمێر ١٨ی رۆژی ١-٩-٢٠١٤ لە شاری هەولێر هەردوو لایەنی پارتی کۆمۆنیستی کوردستان و حزبی رزگاریی کوردستان کۆبوونەوە.

لە کۆبوونەوەکەدا رەوشی هەنووکەیی کوردستان بەتایبەتیش رەوشی رۆژئاوای کوردستان و پێوەندی لەنێوان لایەنە سیاسیەکان خرایەوە بەرباس و لێکۆڵینەوە، هەردوولا هاوڕابوون کە داعش هەڕەشەو مەترسیێکی گەورەی لە سەر کوردستان دروست کردوە، ئەوەش وادەخوازێ کە لایەنە کوردستانیەکان یەک دەنگ و یەکدەست شەڕی چەکدارەکانی داعش بکەن و بەتووندی بەرپەرچیان بدەنەوە، لەو رێیەشەوە کوردستان پارێزراو دەبێ و هەڕەشەکانی داعش دوور دەکەونەوە. هەر لەو پێوەندەدا هەردوولا سوپاس و پێزانینی خۆیان ئاراستەی یەکینەکانی پاراستنی گەل و هێزی پێشمەرگەی کوردستان کرد کە ئازایانە شەڕی داعش دەکەن و لە شەڕەکەشدا سەرکەوتووبوونە.

لە تەوەرێکی دیکەدا جەخت لەسەر بەهێزکردنی پێوەندی دووقۆڵی کرایەوەو وەبیرهێنرایەوە کە پێوەندی هەردوولا مێژووێکی دێرینی هەیەو دەگەڕێتەوە بە هەشتاکانی سەدەی رابردوو، چونکە ئەوێ رۆژێ پێوەندی بە هێزی برایانە لەنێوان پارتی گەلی دیموکراتی کوردستان و پارتی کۆمۆنیستی کوردستان دا هەبوو، هەروەها حزبی رزگاریی کوردستانیش درێژەپێدەری پارتی گەلە، بۆیە دەبێ پێوەندی نێوانیان گەشەی پێبدرێتەوەو نۆژەن بکرێتەوە، خۆشبەختانە هەردوولایەن لەچوارچێوەی کۆنگرەی نەتەوەیی کوردستاندا درێژە بە خەباتی نەتەوەیی و نیشتمانی دەدەن.

جێی ئاماژەیە کە شاندی حزبمان بە سەرۆکایەتی هەڤاڵ رێکار ئەحمەد، سکرتێری گشتی حزب و شاندی پارتی کۆمۆنیستی کوردستانیش بە سەرۆکایەتی بەڕێز کاک نەجمەدین مەلا عومەر بەشداری کۆبوونەوەکە ببوون.