شکۆداربێت ١ی ئایار رۆژی هاوپشتی کرێکاران

کرێکاران! زەحمەتکێشان!

یەکی ئایار وەک رۆژی هاوپشتی کرێکاران واتاو لێکدانەوەی قوڵی خۆی هەیە، هەربۆیەش لەم رۆژەدا کرێکار ، زەحمەتکێش و ستەملێکراوانی جیهان رێز لە خەبات و قوربانیدانی چینی کریکاران دەگرن و یادی ئەو خەباتیگێڕانە دەکەنەوە کە بۆ داهاتوێکی باشتر و پێکهێنانی کۆمەڵێکی یەکسان گیانی خۆیان پێشکەش بە مرۆڤایەتی کردوە . یەکی ئایار بۆ ئاهەنگ و هەڵپەڕین و خۆشی نیە، بەڵکو رۆژی نوێکردنەوەی پەیمان و درێژەدان بە تێکۆشانی چینایەتیە، رۆژی جەتکردنەوەو قوڵکردنەوەی خەبات بێ پسانەوەیە دژبە سەرمایەدارو چەوسێنەران، هەروەها سەکۆێکی دیکەی جۆشدانی خەبات و تێکۆشانی راستینە.

یەکی ئایار رۆژی موکڕبوون و سووربوونی خەباتی شۆڕشگێڕانەیە، مەزنێتی چینی کرێکاران و رەوایەتی تێکۆشانی یەکسانیخوازی پێشان دەدات، رابوونی لێبڕاوانەیە بۆ وەدەستهێنانی ماف و ئازادیەکان و کۆتایهێنان بە چەوساندنەوەو گەیشتن بە وەکهەڤی و دادپەروەری و جیهانی بێچەوسانەوە.

ئێمە لە حزبی رزگاریی کوردستاندا، راشکاوانە پشتیوانی لە داخوازیە رەواکانی چینی کرێکاران دەکەین و خۆمان بەرێبواری کاروانی تێکۆشاوی نەپساوەی ئەوان دەزانین، لەهەمان کاتدا هیواخوازین کە یادی یەکی ئایار بۆ بەهێزکردن و یەکخستنی سەنگەری چینایەتی دەکار بکرێ، هەروەها دەخوازین کە زەحمەتکێش و چەوساوانی کوردستان، لایەنە چەپ و شۆڕشگێڕەکان و ئەوانەی بۆ دادپەروەری و یەکسانی تێدەکۆشن لە دەوری یەکتر کۆببنەوەو هەرچی زووترە بۆ پێکهێنانی چەترێکی هاوبەش هەنگاو هەڵبگرنەوە، چونکە تا ئێستاش چەوساندنەوەو نابەراری شەپۆل دەدات، سەرمایەداران باکیان بە بژێوی کرێکاران نیەو بۆ زۆرکردنی سەرمایەکانیان لەهیچ شتێک سڵ ناکەنەوە، رۆژ دوای رۆژ جیاوازیەکان قوڵتر دەکەنەوە و بەرهەم و رەنجی کرێکاران هەڵدەڵووشن، بۆیە ئەرکی کرێکاران و زەحمەتکێشانی کوردستانە کە بۆ بنبڕکردنی ستەم و نابەرابەری شێلگیرانەو لێبڕاوانەتر تێبکۆشن، راستێکی حاشا هەڵنەگرە کە ستەم و چەوساندنەوە تەنیا بەخەبات و تێکۆشان کۆتاییان دێ، ماف و ئازادیەکانیش بەتەنیا لەڕێی تێکۆشانەوە دەسەندرێن و دەپارێزرێن.

سەرکەوێ خەبات لە پێناو نەهێشتنی زۆرداری و گەیشتن بە یەکسانی و وەکهەڤی..

شکۆداربێت یەکی ئایار رۆژی هاوپشتی کرێکاران.

١-٥-٢٠١٢ مەکتەبی سیاسی

هەولێر حزبی رزگاریی کوردستان